Seedorf-a'n Hazard a inpe tawk loah a ngai

Spanish club lian Real Madrid a beisei ang hlawhtlinna chhar thei lo Eden Hazard chu Madrid midfielder hlui Clarence Seedorf chuan a inpe tawk loa a hriat thu a sawi. 

Hazard hian kum 2019 khan Chelsea aṭangin Real Madrid hi a zawm a, a khelh ṭhat dan a zirin a man hi pound maktaduai 150 thlenga sang chho thei tura tih a ni - tuna a khelh dan en erawh chuan Real hian pound maktaduai 150 insen kher an ngaiin a rinawm loh. 

Real Madrid tan a khelh hnua Inter Milan leh AC Milan lama hming chher zui Seedorf chuan, "Hazard chungchanga ka sawi fo ṭhin chu a ṭha ber zinga tel turin theihna a nei tih hi a ni. A pawimawh ber erawh, "Player ṭha ber huanga awm turin a inpe tawk em?" tih hi a ni. 

"Lionel Messi leh Cristiano Ronaldo anga talbuai loa khelh ṭhat reng a pawimawh a, Cristiano hian kum tam tak chhung a khelh ṭhat reng theih tih a pholang - chumiin a tarlan chu rilru lam a tel ve bawk tih hi a ni," a ti a, Hazard tan entawn tur a chhawpsak. 

Hazard hian season hmasa khan Real Madrid tan inelna hrang hrangah match 22 khelin goal khat chiah a khung a, vawi sarih assist a neih hi ṭha thawkhat viau mah se Ronaldo hmun ruak hnawh khat tura lak a nih avangin uanpui tham a ni lo. 

Kum 29 mi Hazard hi hliam vangin a chawl mek a, Belgian forward hi a kum a tlem tawh bik loh avangin tun season a chet ṭhat hi a career din thar leh tura pawimawh chu a ni ang.