Copa America 2024 Mexico-in Ochoa, Lozano & Jimenez mamawh lo

Copa America 2024 khel tur Mexico chuan squad an puang a, an squad-ah hian player tawnhriat nei ṭha Guillermo Ochoa, Hirving ‘Chucky’ Lozano leh Raul Jimenez te tan hmun a awm lo - Mexico hian player naupang rual nena inelna hmachhawn an duh.

Kum 38 mi keeper Ochoa hi world class keeper tia chhal tur ni lo mah se, ram tan major tournament-a a chet ṭhat ṭhin avangin hriat a hlawh hle - tun ṭumah erawh squad-ah a lang phak ta lo.

Kum 38 mi Ochoa hi Lozano nen hian March thla lawk khan CONCACAF Nations League squad-ah an la tel a, final-a 2-0 a USA an hneh loh ṭumin player pahnih hian bul an ṭan nghe nghe - Mexico tana match 150 khel tawh Ochoa phei chu captain a ni hial a ni.

Hetihlai hian Raul Jimenez tan pawh hmun a awm lo. Kum 33 mi striker hi Fulham a pan hnuah beisei angin a khel thei lo a, hliamin a tlakbuak ve reng bawk - season hman zawh takah khan match 29 khelin goal sarih a khung a, Mexico squad-a awm nan a tling tawk lo.

PSV Eindhoven winger Hirving Lozano hian season hman zawh takah khan inelna hrang hrangah match 33 khelin goal ruk a khung a, assist vawi thum a nei - Dutch league-ah PSV hi a champion pui a, Copa America erawh a khelh phah dawn ta chuang lo a ni!

Lozano chuan an ram tana khel turte duhsakna hlanin, "Khelmualah ka awm emaw, a pawn lamah ka awm emaw pawh ni se, kan ram team hi keimahah a bet tlat tawh a ni. Tunah chuan in kutah Mexico a innghat ta a, kan intawn leh ngei ka beisei - in theihna zawng zawng hlanin, he Mexico ram hi chawimawi rawh u aw," a ti a, ram tana vawi 70 inlana goal 18 khungtu hi ram tan la inlan leh ngei a beisei.

Mexico tana inlan tam pathumna Ochoa hi Serie A club Salernitana keeper a ni a, a tawnhriat ringawt pawh Mexico tan ṭangkaipui tham tur ni mah se, a tan squad-ah hmun a awm bik chuang lo a, Mexico hian an player langsar pathum tel loin Copa America an hmachhawn dawn.

June 23, Pathianni zinga Jamaica nena an match hmasa ber khel tur Mexico sporting director Duilo Davino chuan, "World Cup khelh nan kum hnih chauh a awm tawh a, kan hmun kan tifel tawh bawk. Chuvang chuan tun hun hi result ringawt thlir lo a, kum 2026 atana inbuatsaih nan hman kan duh a ni," a ti.

World Cup 2026 chu Canada, Mexico leh US ten an inthlen ṭawm dawn a, a thlengtu nihna angin Mexico hi tling chiang sa an ni - World Cup inbuatsaih nan Copa America hman an tum a ni ber a, an ram leilunga World Cup thlen hunah chet ṭhat an tum hle tih a lang.

Mexico coach Jaime Lozano chuan, "Player hrang hrang kan neih dante kan thlir a, a pawimawh ber chu kum 2026-a a ṭha thei ang bera inphochhuah theih hi a ni," a ti a, Copa America chu player tam takin tawnhriat ṭha zawk neih nan an chhawr theih a beisei.

Tun ṭum Mexico squad hi an naupang tlang hle a, an kum chawhrual pawh 25 chauh a ni. Midfielder pathum West Ham player Edson Alvarez, AEK Athens midfielder Orbelin Pineda leh Cruz Azul midfielder Uriel Antuna te chu player 26 zinga ram tana vawi 50 inlan tling tawh an ni.

World Cup 2022-ah khan Mexico hi Argentina, Poland leh Saudi Arabia te nen group khatah awm hoin, group stage-ah an tla a, Gerardo Martino chuan inelna zawh ruala chhuahsan zuiin, amah thlaktu Diego Cocca phei chuan match sarih bak a enkawl hman lo - Lozano hnuaiah indinthar an tum mek.

Copa America hi June 21, Zirtawpni zingah match hmasa ber khelh tur niin, Argentina leh Canada ten match hmasa ber an khel dawn. Tun inelna hi CONMEBOL chauhin buatsaih loin, CONCACAF nen an buatsaih dun a, US-in thlengin, World Cup 2026 inbuatsaih nana tih a ni tel.

South America ram Argentina, Bolivia, Brazil, Chile, Colombia, Ecuador, Paraguay, Peru, Uruguay leh Venezuela bakah CONCACAF ram aṭangin Nations League result kaltlangin Jamaica, Mexico, Panama, USA, Canada leh Costa Rica an tel ang.

Ram 16-te hi group paliah, team pali zel awma ṭhen hran niin, group tina a sang pahnihte chu round of 16 khel turin an inpetkai dawn a ni.

Mexico squad

Goalkeepers: Carlos Acevedo (Santos Laguna), Raul Rangel (Guadalajara), Julio Gonzalez (Pumas UNAM)

Defenders: Israel Reyes (Club America), Jorge Sanchez (Porto), Brian Garcia (Toluca), Cesar Montes (Almeria), Johan Vasquez (Genoa), Jesus Orozco (Guadalajara), Gerardo Arteaga (Monterrey), Bryan Gonzalez (Pachuca)

Midfielders: Edson Alvarez (West Ham United), Luis Romo (Monterrey), Erick Sanchez (Pachuca), Orbelin Pineda (AEK Athens), Roberto Alvarado (Guadalajara), Luis Chavez (Dynamo Moscow), Fernando Beltran (Guadalajara), Jordi Cortizo (Monterrey)

Forwards: Marcelo Flores (Tigres), Cesar Huerta (Pumas UNAM), Julian Quinones (Club America), Santiago Gimenez (Feyenoord), Alexis Vega (Toluca), Uriel Antuna (Cruz Azul), Guillermo Martinez (Pumas UNAM)