Punjab FC an inṭhuahfai dawn

Indian Super League club Punjab FC chu coach Staikos Vergetis nen an inṭhen a, a hnu lawkah an player 14 ngawt an chhuahtir thu an tarlang bawk - Punjab player chhuak zingah hian Mizo player Isaac Vanmalsawma leh Daniel Lalhlimpuia te an tel.

Kum 47 mi Vergetis hian 2022-23 season ṭan dawn khan Punjab hi a zawm a, a zawm tirh hian I League club niin, league match 22-ah vawi hnih chiah a tlawmpui a, vawi 16 hnehna changin I League champion an ni - ISL an inpetkai nghal.

ISL-a an season hmasa ber chawhma lamah an talbuai a, match hmasa 10-ah chak an nei lo. Mahse, Greek coach kaihhruaina hnuaiah, season chawhnu an insiamrem a, playoff khelh hial an beisei leh hman!

Match 22-a point 24 hmuin, table-ah pakuana an ni a, playoff khel phak chin parukunaa awm Chennaiyin an phak lohna chu point thum chauh a ni. Mahse, Punjab-in an coach nena an inṭhen thu an puang a, assistant coach Dimitrios Kakkos leh strength and conditioning coach Nikolaos Tsagkatakis te chuan an pu hnung hi an zui.

ISL club hian an coaching staff-te an thlah hnuah player 14 thlah ve lehin, foreigner panga Dimitrios Chatziisaias, Madih Talal, Luka Majcen, Juan Mera leh Wilmar Jordan Gil te an chhuahtir vek a, Indian player Bidyashagar Singh, Sahil Tavora, Isaac Vanmalsawma, Mohammed Salah, Amarjit Singh Kiyam, Krishnananda, Sweden Fernandes, Daniel Lalhlimpuia leh Prasanth K te an chhuak bawk.

Punjab player chhuak zingah Luka Majcen hi I League aṭanga an player langsar a ni a, season hman zawh takah khan league match 22 khela goal riat khungin, assist vawi hnih a nei bawk. French midfielder Madih Talal hian league match 22 a khelhah goal ruk khungin, assist vawi 10 a nei a, season hman zawh taka ISL-a assist ngah ber a ni a, East Bengal a zawm a rinawm.