Messi sum hnar a tam - Al Hilal President

Saudi Pro League club Al Hilal president Anmar Al Haili chuan season hmasa nipui lai khan Lionel Messi chu an hnena khel tura an sawm ngei thu a sawi a, mahse, Messi hian a chhungkua a ngaih pawimawh avangin Saudi club sawmna hi a hnar.

Al Haili sawi dan chuan an club hian Messi hi euro tluklehdingawn 1.4 hlawh turin an sawm a, mahse, Argentine forward hian a hnar! Al Hilal President chuan, "Paris-a a contract a zawh khan Messi hi kan be pawp nghal a, €1.4tld a hmaah kan chhawp. Mahse, a chhungten US-a awm an duh avangin a hnar nghal," a ti!

Al Hilal hotupa chuan sawi zawmin, "A chhungte avang chauha khati zat sum player-in a hnawl thei kha chu thil mak tak a ni. A chhungte hmin kha chu a theih mai ang a, mahse, a duh lo. Sum aiin chhungkua a pawimawh zawk tih ka hria a, a thutlukna kha ka zahsak hle a ni," a ti a, Messi a huat phah lo.

Kum 36 mi Messi hian Al Hilal sawmna pawm se chuan, Barcelona leh Paris Saint-Germain-a a khelhpui ṭhin Neymar nen an khel dun leh thei tur a ni a, mahse, Major League Soccer lam hawiin USA a pan ta zawk.

David Beckham-a club Inter Miami zawmin, Messi hi Barcelona-a a ṭhian hlui Luis Suarez, Sergio Busquets leh Jordi Alba te nen an khel ho leh ta tho a, season hmasa khan Leagues Cup-ah champion puiin, tun season khelh mekah MLS Eastern Conference table-ah pakhatna an ni mek.

Messi hi a kum vangin a tha ṭhum ve deuh tawh mah se, a thiamna erawh a la theihnghilh lo. US a pan hnuah Inter Miami tan inelna hrang hrangah match 29 khel tawhin, goal 25 a khung a, assist vawi 16 a nei bawk.

Ram tan a la inkhelh chhunzawm reng bawk a, Copa America 2024-ah pawh a hoin Argentina an inlan leh dawn - World Cup 2022 champion team hian Copa America-ah pawh champion aia hniama lungawi an tum lo ang.