Hernandez hma hun a chiang lo

AC Milan left back Theo Hernandez chuan a hma hun a sawi chiang duh lo a, season tharah Serie A club tan a khelh chhunzawm lo a nih pawhin a mak lo ang.

Kum 26 mi defender hian July 2019 khan AC Milan hi a zawm a, Atletico Madrid youth system chhuak niin, Alaves, Real Madrid leh Real Sociedad tan a lo khel tawh bawk.

Season hman zawh takah khan Milan tan inelna hrang hrangah match 46 khelin goal nga a khungsak a, assist vawi 11 a nei bawk - a khel ṭha takzet a, European football-a club lian ho chil a tiput.

Tun dinhmunah chuan Hernandez hi Bayern Munich leh Chelsea nen sawizawm a ni a, mahse, Euro 2024 khel tura France tana fehchhuak mek defender hian a hma hun a sawi chiang duh rih lo.

France tan vawi 27 inlana goal hnih khungtu fullback chuan, "Milan-a ka cham dawn leh dawn loh chu nakinah kan hre mai ang. Tun dinhmunah chuan European championship chiah ka ngaihtuah rih a ni," a ti a, transfer lam a hawi rih loh thu a sawi.

Les Bleus fullback Hernandez hi amah duhtu zingah Bayern chuan an rim ngawrh hle nia sawi a ni a, German club hian an fullback Alphonso Davies chu contract thar an ziahpui theih rih loh avangin a thlakna tur an melh ṭan - Davies hi Real Madrid-a la kal tur anga sawi a ni.

Bayern hian rin loh takin coach thar atan Vincent Kompany an la lut a, Manchester City legend hi Premier League aṭanga Burnley tlakpuitu a nih avangin a kaihhruaina hnuaia Bayern team hi khawvelin hmuh a châk hle.

Season thar Bundesliga hi a ngaihnawm dawn hrim hrim - champion lai Bayer Leverkusen chu kum 42 mi Xabi Alonso enkawl lai niin, Borussia Dortmund chuan an coach atan an club player hlui, kum 35 mi Nuri Şahin chu an ruat thar bawk a, kum 38 mi Kompany kaihhruai Bayern leh heng club pahnihte inel vel tur hi Bundesliga tingaihnawmtu a tling phak ang.