Real-in Olympics khelh an phal lo - Mbappe

France striker Kylian Mbappe chuan tun nipuia Paris khawpuia neih tur, Olympics-ah France tana inlan a châk thu sawi mah se, a club thar Real Madrid chuan Olympics-a a inlan an phal loh thu a sawi.

Kum 25 mi Mbappe hi June 3-a France provisional squad an puanah a tel lo a, hemi chungchang hi sawifiahin, "Real dinna a chiang a, he club zawm tura thutlukna ka siam khan Olympics khelh a rem dawn lo tih ka hrethiam sa," a ti.

European champion Real hian Euro 2024-a inlan an player-te chu Olympics football an khelh a rem ti lo a, Mbappe chuan a hriatthiam thu a sawi.

Paris St-Germain-a a contract a hman zawh hnua Real zawmtu Mbappe chuan, "Hei hi club kalphung a ni a, ka hrethiam khawp mai. September-ah ka team thar ka zawm dawn a, hmun danga awm bo leh daih kha a fuh chiah lo ve bawk a ni.

"Tunah chuan French team hi ka duhsakna sang ber ka hlan a, an inkhel apiang ka en ang - gold medal an hlawhchhuah ngei ka beisei," a ti - mipa Olympics football hi July 24 aṭangin khelh ṭan a ni ang a, August 9-ah a zo ang.