Bangalore an che ṭha zel

Indian Premier League-ah Virat Kohli kaihhruai Royal Challengers Bangalore chuan Thawhṭanni zan khan Kolkata Knight Riders run 82 in an hneh a, table-ah pathumna niin pakhatna Mumbai Indians nen point 10 ve ve an hmu. Zanin dar 7:30 hian IPL khelh chhunzawm a ni dawn a, Delhi Capitals leh Rajasthan Royals te an inkhel ang. 

League round-ah hian team tinin match 14 ṭheuh an khel dawn a, tunah hian vawi khat ṭheuh inkhel chhuak tawhin match sarih ṭheuh an khel leh ang. 

Sharjah Cricket Stadium-ah Royal Chal-lengers-in bat hmasak an thlang a, opener Aaron Finch (47) leh Devdutt Padikkal (32) ten bul an ṭan ṭhat bakah captain Virat Kohli (33*) leh AB de Villiers (73*) ten an thlawp ṭha bawk.

South African bats-man De Villiers hian run 73 siam turin ball 33 chauh a mamawh a, six vawi ruk zet hlap chhuakin four vaw nga a vaw chhuak bawk. Bangalore hian wicket hnih chauh hlohin run 194 an siam.

Kolkata Knight Rid-ers aṭanga che ṭha ber Shubman Gill-a'n run 34 chiah a siam a, run 20 siam pha dang an awm lo. Bangalore bowler te an che ṭha tlang a, Kolkata hian over 20-ah run 112/9 siamin run 82-in an chak lo.