Scholes-a'n Salford enkawl dawn

Salford City chuan manager Graham Alexander an ban a, Manchester United player Paul Scholes chu club enkawl lailawk tur atan an ruat.

Kum 49 mi Alexander hian 2018-19 season aṭangin Salford hi a enkawl ṭan a, season khatnaah hian English Football League-ah a kaipui. Season liam ta khan Salford hi League Two-ah 11-na chauh an ni a, playoff an khelh phak bak loh bakah Alexander-a'n a naute a khelhtir danin club thuneitute lung a dum lo.

Tun season-ah Salford-in hneh loh tawng lo mah se match nga an khelh aṭangin vawi thum an inhnehtawk a, table-ah panganaah an awm mek. Salford enkawl lailawk tur hian head of youth development Warren Joyce chu beisei ni mah se Covid-19 vangin a inkhung hrang mek.

Hemi a nih avang hian club neitu zinga mi Scholes hian a enkawl lailawk dawn a, tun Inrinnia Port Vale nen an inkhelh hun aṭangin a kaihruai ṭan ang. England international hlui hian kum 2019 khan an seilenna club Oldham Athletic a enkawl a, ni 31 lek hnuah a duh anga player-ten an khelh chhuah theih loh avangin a bang.