Zaninah World Cup 2018 final rematch

Zanin dar 12:15 hian Croatia-in Stadion Maksimir, Zagreb-ah France an mikhual dawn a, Nations League-a inkhel turte hi World Cup 2018 final-a inhmachhawnte kha an ni. 

Kum 2018 khan final hmuhnawm takah France-in Croatia hi Luzhniki Stadium-ah 4-2 in an hneh a, hemi ṭuma Les Bleus tana goal khungtu Antoine Griezmann, Paul Pogba leh Kylian Mbappe te hi Didier Deschamps-a hnuaiah player pawimawh an la ni zel.

Croatia tana goal khungtu Mario Mandzukic erawhin ram tana inkhelh a chawlhsan tawh a, chutihrualin goal hnihna khungtu Ivan Perisic leh Golden Ball dawngtu Luka Modric te erawhin hmun pawimawh an la chang thung.

Croatia hian kumin Nations League-ah Sweden chiah an la hneh a, France leh Portugal lakah an tlawm. September 8-a Stade de France-a an inkhelh ṭumin France-in 4-2 an hneh a, World Cup final-a an chak lohna zat chiah a ni.

Zanin hian hrem vangin Croatia tan Marcelo Brozovic a khel thei dawn lo a, chutihrualin mahni muala khel tur an nih bakah Sweden hneh hlim an nih avangin inrintawkna an nei ang. 

France erawh tun dinhmuna ram anga player nei ṭha ber zinga mi an ni a, kil tinah player ṭha an kawl. Goal nawr turin Kylian Mbappe, Olivier Giroud, Antoine Griezmann leh Paul Pogba te ho an kawl a, tlarhnung lamah tun laia defender chhuak thar ṭha Dayot Upamecano te bench-ah an dah thei a, group hmahruaitu ni turin chak ngei an tum ang.