Arsene Wenger a inbun ruak!

Arsenal manager ropui, tuna FIFA Chief of Global Football Development ni ta Arsene Wenger chu BBC Sport-in an kawm a, tun hma lama a hun tawn ngaihnawm leh tunlai football boruak hrang hrang a sawi chhuak.

Gunners, Real Madrid, VAR, Mesult Ozil, Zlatan Ibrahimovic leh Mikel Arteta chungchang te chu a thu sawi tam tak zinga ngaihven hlawh zual a ni a, tun hnaia ram leh ram inelna Nations League pawh awmze nei zawka kalpui a duh thu a sawi.

Wenger hian October, 1996 khan Arsenal a zawm a, a tirah chuan mi hriat hlawh a ni ngai lo. North London club tan season 22 zet hna a thawk a, London khawpui a chhuahsan meuh chuan English football hmelhmang thlak danglamtu tia sawi a ni hial.

Arsenal chungchang sawiin Wenger chuan, "Ka club hmangaih tak tan kum 22 chhung hun ka hmang, training centre ka siam a, chumi hnuah Emirates Stadium kan sa bawk. Stadium sak kawngah leh a hnua thil ṭha tam tak a hrin chhuahte avangin ka lawm hle.

"Ka hun hmasa lam kum 10 chhung kha chu nomawi chawi tuma inbeihna a ni a, a hnu lam kum 10 kha chu a hautak zual hle. Hun hnuhnung lamah khan nomawi chawi lo mah ila football hmuhnawm bik kan khel a, player ka chher chhuak hnem bawk," a ti.

A hun hnuhnung lamah Wenger hian result a nei ṭha tawk lo a, fans zingah ngei pawh chhuak tura duhtu an tam. 'Wenger Out' tih inziahna kenga kawng zawh pawh an awm hial ṭhin. May, 2018 khan a hna hi a chawlhsan, a hnuah Emirates Stadium-ah hian a la kir leh lo.

Wenger chuan, "Khatih hunlai khan a boruak a zirin thil a thleng a ni mai a, ka ngai kawi lem lo. Social media vela mi 50 velin an ngaihdan an put darh chiam hi thil nihna tak teh nan a tlak loh, hrethiam lo tan chuan stadium chhunga fans 60,000 ngaihdan aia dah san palh theih a ni.

"Chhut let ula, 2016 khan pahnihna niin Leicester City hnuaiah kan awm - Foxes kha season tluanin vawi thum chauh an chak lo. 1997 hnu lama a vawi khat nan 2017 khan Champions League kan khel lo ve chauh," a ti, tuna laia UCL khelh tum hram hram Gunners tan ngaihtuah let tham a tling.

Arsene Wenger-a'n Arsenal a enkawl lai hian Manchester United pawhin manager ropui an nei, a hming chu Sir Alex Ferguson a ni. A hnu lamah Chelsea enkawltu Jose Mourinho nen na takin an inel chhunzawm leh bawk.

Wenger chuan, "England-ah ka awm tam loh avangin tun hnuah hian ka be zui tam lem lo, khelmual chhungah a nih tawh chuan kan chak theih nan ṭawngkam leh che zia hmangin na tak takin kan inbei ṭhin a, thil tih awm leh tih tur a ni bawk.

"Kan team tan a nih chuan a changin kan tuar a, a changin kan lawm bawk ṭhin. Manager pahnih hi tun thlengin ka zah em em a, a hunlai pawh khan na tak takin inbei ṭhin mah ila khelmual pawn lam a nih tawh chuan boruak ṭha lo a awm zui ngai lo," a ti.

English manager a nih tirha team hmachhawn harsa leh player hmachhawn hautak a tih an zawhna chhangin Wenger chuan, "Team zingah chuan AFC Wimbledon kha a ni a, player zingah chuan Roy Keane leh Alf-Inge Haaland," tiin a chhang.

Wimbledon hi tunah chuan League One club an ni rih a, a player sawite khi chu Mizo zingah pawh inhrilh nawn a ngai lo. Manchester United captain rorum Keane hi Wenger bakah Gunners captain hlui Patrick Vieira nen an inbakkaih nasa thei hle.

Nottingham Forest, Leeds United leh Manchester City tana khel tawh midfielder Haaland pawh hmachhawn harsa a ti hle. Norway international hian fapa Erling Haaland a nei a, tunah chuan a fapa hi khawvel striker hmabak nei eng berte zingah a awm leh der tawh.

Arsene Wenger-a'n Real Madrid aṭangin pound maktaduai 42.4 zetin Mesut Ozil a lei a, a hunlaia club player manto ber a ni. German international hlui hi a hun hmasa lamah ṭangkai viau mah se tunah chuan chhawr lohin a awm mek.

Wenger chuan, "A hun a khawhral mai a ni, player theihna nei sang leh themthiam bik a ni a, khingpuite goal bula ball thunun thiam leh killer pass nei thei a ni, mah se tunah chuan amah leh club hian a lo thlawnin hun an khawhral ni maiah ka ngai.

"Tunah hi chuan football khelh dan kalphung a inthlak ta, team tin mai hian rang tak takin ball an inpe kual a, goal nawr leh a venhim kawngah an ṭangrualin an tlan tam. Inkhelh dan phung hi Ozil te ang chi player tan a harsa," a ti. Chhawr theih dan kawng ngaihtuah chu thil ṭha a nih thu a sawi bawk.

Kum 2000 khan Arsene hian Swedish rawlthar Zlatan Ibrahimovic chu lakluh a duh a, 'trial' nei turin a sawm. Mahse, Ibra chuan a hnar! Tun hnuah Ibra hian, "Zlatan-a'n enchhinna a nei ve ngai lo," tiin a lo sawi tawh.

Wenger chuan, "Khatih hunlai khan kum 17 mi chauh a la ni a, Sweden rama second division club Malmo tan a khel, tumahin an la hre ngai lo. Player tam takin kan hnena khel turin enchhinna an nei ṭhin a, thil pangngai a ni," tiin trial nei tura Ibra an duh chhan a sawi.

Arsenal manager a nih lai khan Arsene Wenger hian Real Madrid enkawl tura sawmna vawi hnih a hnar a, club lian dang Bayern Munich, Juventus, Paris St-Germain leh Manchester United bakah France leh England manager ni tura sawmna a hnar bawk.

Sawmna a hnawl zinga harsa a tih ber sawiin Wenger chuan, "A nihna takah chuan Real Madrid kha a ni, Spanish club lianin ṭum hnih an sawmna hnawl hi an tam lo ang, harsa lutuk loa champion mai theihna team kha a ni miau a.

"Mahse kei chuan Arsenal enkawl chunga chona hmachhawn kha ka duh zawk, a tawp thlengin chutah chuan ka dingnghet. Manager hian mize hrang hrang an nei, Monaco manager ni rei ber ka ni a, Arsenal manager ni rei ber ka ni bawk, hei hi ka mizia chu a ni," a ti.

European football huangah chuan Video Assistant Referee hman a ni tawh a, ram leh ram inelna bakah tournament lian vak lo zawk thlengin VAR hi hman zel a ni a, an la hmang zel dawn ni pawhin a lang.

VAR chungchang sawiin Wenger chuan, "A ṭha tawk em tih kan sawi dawn chuan a hnathawh kan chhut hmasak a ngai, statistics aṭanga teh chuan a tir lama thutlukna a siam dik dan kha 84% a ni a, tunah chuan 95% a ni tawh, mimal ngaihdan ai chuan hei hi a pawimawh zawk.

"He khawl hian inthamna a ti nep thei, thutlukna kha mi pakhat kutah chauh a awm tawh lo a ni, a chang chuan endik nan hun a duh rei avangin a ninawm hman a ni mai thei, mahse VAR hi hlip ta ila hma leh nghal mai an duh tawh ang," a ti.

Sawi chhunzawmin Wenger chuan, "Nikum khan mite chuan offside dan kha an duh lo, kuminah erawh tuman an sawisel tawh loin ka hria. Mipui hian sum leh thil dang an duh hran lo, an duh ber chu thutlukna dik a ni," tiin a sawi bawk.

Arsene Wenger hi khawvela football-in hma a sawn zel theih nana hna thawktu zinga an hotu a ni a, a kaihhruaina hnuaiah hian kalphung ṭhenkhat chu siam danglam a nih a rinawm.

Arsene Wenger-a'n Mikel Arteta a ringtawk hle a, a kaihhruaina hnuaiah Premier League nomawi an chawi theih ngei a beisei - chutihrual erawh chuan hun a mamawh tur thu a sawi tel bawk.

Spanish manager Arteta-a'n season hmasa chawhnu lam aṭangin Gunners a enkawl a, FA Cup a chawipui nghal. Tun season league match an khelh tawh chinah point 12 hmuh tur awm aṭangin point kua an hmu bawk.

Wenger chuan, "Manager ṭha leh chungnung nei turin theihna a nei, ani ang hi ka enkawl zingah khan an awm nual. Hlawhtling tur erawh chuan hun pek a ngai a, a duh anga hna a thawh theih nan a zalen a ngai bawk ang.

"A fingin a remhre hle a, a rilru a paukhauh bakah zah a kai bawk. Amah puibawmtu pawh an ṭha viau chuan ka hria," a ti. Arteta hi player a nih lai khan Wenger hian manager ni tura theihna nei tiin a lo sawi lawk tawh bawk a ni.