The Guardian Next Generation 2020; Vanglaini Bihchianna: Footballer ṭha rual zingah Manipur rawlthar

English chanchinbu lar 'The Guardian' chuan 'Next Generation 2020' list an tichhuak leh ta a, khawvela rawlthar footballer 60 beiseiawm rual hming an chhawp chhuak. 

Player 60-te hi khawvela club lar tak tak Real Madrid, Manchester City, Barcelona, Paris St-Germain, Bayern Munich, Inter Milan leh club dang dang tana khel an ni hlawm a, an ram leh club khelhna enin Next Generation list a an lang phak hi thilmak tia sawi tur a ni lo. 

Mahse, chutiang rawlthar rual - nakin kum nga hnu vel lawka pound maktaduai tel hlawh thei tur zingah chuan Indian rawlthar pakhat hming a lo lang ve nawlh a, a hming chu Bikash Yumnam a ni. 

Ni e, i chhiar dik - Manipur a mipui sing chuang awrh chenna Lilong Chajing aṭanga seilian rawlthar hi 'The Guardian Next Generation 2020' zingah a lang a, hmabak erawh a la ko hle. 

The Guardian Next Generation 2020 list-ah Bikash a lan rualin Vanglaini chuan Minerva Academy aṭanga inzirchhuak rawlthar hi a be pawp nghal a, a beisei miah loa khawvel rawlthar footballer ṭha rual zinga a tel thu a sawi. 

Bikash hian season hmasa khan AIFF hnuaia rawlthar rual awmkhawmna Indian Arrows tan a khel a, kum 17 mi niin centre back-ah a khel ṭhin a, season tharah Punjab FC tan I League a khel ang. 

Manipur defender chuan, "Mak ka ti a, ka rin phak loh thil a ni. Minti phur takzet a, ka hmaa chona inchhawp pawh a hautak lehzual dawn a ni," tiin Vanglaini a hrilh a, theihtawp a chhuah chhunzawm tur thu a sawi. 

Meitei tlangval hian a naupan lai aṭangin footballer nih a chak a, Minerva Academy a awmsa a ṭhianpa chuan trial nei ve tura a sawi hmuh angin Chandigarh-ah mahnia kalin trial a nei a, tun dinhmun hi a thleng ta. 

Manipur tlangval-in Minerva Academy a trial a neih hmasak bera entu zinga mi chu he academy neitu, Indian football a chanchin ngah ve tak Ranjit Bajaj a ni.

Ranjit chuan, "Centre back-ah a khel a, ball a keng thei em em a, centre back ball thiam tak hi Indian football-ah an tam loh avangin ka mit a la nghal a ni," tiin Manipur defender an thlan dan Vanglaini a hrilh.  

Minerva Academy hian footbal-ler ṭha tak tak a chherchhuah avangin Indian football-ah hriat an hlawh a, Bajaj chuan, "Naupang kan enkawlna kawnga kan ngaih pawimawh lai ber chu an rilru hi a ni. 

"Academy player an nih lai aṭangin senior team nen kan practice ho tir a, hei hian an rilruah huaisenna a tuh a, eng team pawh tum se an hlau ngai lo," a ti a, player-te chu an taksa a len theihna tura an puih nasat thu a sawi bawk. 

Bikash Yumnam hian India Under 16 leh Under 19 tan inter-national level-ah chuan a lo khel tawh a, senior team-ah erawh Blue Tigers tan a la inlan ngai lo. 

Season hmasa I League a Arrows tana match kua kheltu defender chuan, "I League leh Indian Super League lam ka la ngaihtuah lo a, ka khelhna tur hmun buaipuia buai thei ka ni rih lo. 

"Tuna ka thlir ber chu ram tana khelh phak a ni a, India jersey ha chunga senior team tana ka inlan ngei theih nan theihtawp ka chhuah dawn a ni. Chu chu ka tum hmasak ber a ni," a ti. 

Bikash chuan, "Keimah ang thoa list a langte hi European club lian tak takah an khel tih ka hria a, an 'level' angah hian ka awm reng thei ang tih ka ring. Chumi atan chuan theihtawp ka chhuah zel dawn a ni," tiin Vanglaini a hrilh a, tawp mai a tum lo. 

Bikash-a chher liantu Minerva academy aṭangin Indian footballer ṭha tak tak an chhuak tawh a, Bajaj chuan, "Jeakson Singh-a'n Under 17 World Cup-ah India tan goal a khung a, Anwar Ali-a'n COTIF Cup-ah Argentina U20 lamah a khung a, tunah Bikash-a chanchin kan hre leh ta. 

"Football academy ka buaipui avanga ka hlawkna min zawt hian tam tak an buai fo a, ka hlawkna chu sum leh pai ni loin heng player-te hi an ni. Sum hlawkna ai chuan anni ang player chherchhuah hi ka tan chuan lawmman ropui tak a tling zawk," a ti. 

Ranjit Bajaj neitu nihna hnuaiah Minerva Punjab hian I League nomawi an lo chawi tawh a, an academy chu AIFF U16 Youth I-League (2015-16, 2016-17, 2017-18), U13 Youth league (2017-18) leh U18 Elite Youth League (2018-19)-ah an lo champion tawh bawk. 

Bajaj hian Minerva hi sumdawng lian RoundGlass hnenah a hralh tawh a, anni hian ISL khelhpui an tum - Chandigarh tlangval Ranjit erawh 'Mission 2034' project a buaipui mek a, kum kua hnuai lam footballer zawngin India ramah a zin kual dawn. 

Rilrua zawhna lo awm chu, "The Guardian hian eng ang takin nge 'next generation hi an thlan?" tih hi a ni a, Bikash-a lo lan ve ngawt dan hian mak tih a hlawh - Indian player zinga lang hmasa ber a ni. 

Bikash hian AFC U18 Champion-ships 2018-ah khan India tan a khel a, tlarhnung laiah a ding khawng hle - India U18-in quarterfinal hial an thleng a, group stage a goal an chhuah loh nan a thawh hlawk hle. 

ISL club lianten an rim chungin hmun a chan tam theihna tura khelh zel a la thlang rih a, game thlir thiam tak a nihna piah lamah a ball thiam leh throw-in a thiamna chu a larpui a ni. 

Ranjit Bajaj chuan, "Throw-in ah a ṭha em em a, a ball vawm ka fak thiam dan ber chu 'throw-in' na remchang kan neih reng rengin kan tan chuan freekick ang a ni zel a ni," a ti!

Bikash hian instagram lamah season hmasa I League a Indian Arrows tana a 'throw in' lai chu a pholang a, he video hi Liverpool 'throw-in' coach Thomas Gronne-mark chuan a lo hmu fuh.

European club lian zawkah chuan 'throw-in' hi an ngaih pawimawh avangin a hranpain an zir ṭhin a, Liverpool-in Premier League nomawi an chawi nana goal 85 an khung zinga goal 14 kha 'throw-in' aṭanga kal a ni. 

Gronnemark chuan, "Bikash-a ball vawm hi 'long throw-in nih dan tur entirna dik tak a ni. A vawm sang mah mahin a lang deuh a, mahse a quality erawh sang tak a ni," a ti!

Next Generation list-ah hian Marcus Rashford, Ousmanne Dembele (2014), Trent Alexander Arnold, Christian Pulisic, Martin Odegaard (2015), Jadon Sancho, Gianglugi Donnarumma, Matthijs de Ligt (2016), Vinicius Junior, Alphonso Davies, Erling Haaland (2017), Mason Greenwood (2018) leh Ansu Fati (2019)-te pawh an lo lang tawh a, chutihrualin beisei phak loa thamral ta tam tak an awm tawh bawk.