Radwanska hnehtu Pironkova

World number 102 Tsvetana Pironkova chuan seeded pahnihna Agnieszka Radwanska hnehin French Open quarterfinal a inhlangkai.

Ruahsur vangin French Open khelh mek-ah buaina a thleng fo a, Thawhṭannia an inkhelh ṭumin Radwanska hian 6-2, 3-0 in hma a hruai fal hman. Mahse, Thawhlehnia inkhelh chhunzawm a nih hnuah Radwanska hian game hmasa 10 hloh zawnin 2-6, 6-3, 6-3 in a chak lo zawkah a ṭang ta a ni.

Kum 27-a upa Rad-wan-ska chuan, "Garnd Slam inelna a ni a, ruah surin min ti buai nasa lutuk hi chu a hrilhhai thlak hle. Inkhelh kan chhunzawm hnuah pawh khan ruah khan min ti buai leh deuh a, chawl lo a min khelh tlang tir kha ka hrethiam lo," tiin a chak loh chhanah ruah sur vanga buaina chu a puh.

Inkhel dangah 2014 runner-up Simona Halep chu Samantha Stosur lakah 7-6, 6-3 in a lo chak lo ve bawk a, Stosur hian kum 2012 US Open quarterfinal a khelh hnua a vawi khat nan Grand Slam tournament-ah last 16 a paltlang ve leh chiah.