Inhliam Rafinha aiah Lucas

Copa America khel tur Brazil chuan player inhliam Barcelona midfielder Rafinha aiawh turin Paris Saint-Germain winger Lucas Moura an ko.

Kum 23-a upa Rafinha hi Copa del Rey final-a Barcelona leh Sevilla an inhmachhawn ṭumin a inhliam a, Copa khelh huna a dam hman beisei a nih tak loh avangin coach Dunga chuan Lucas hi a ko a ni.

Rafinha hian season hman zawh takah khan Barcelona tan inelna hrang hrangah match 11 chiah khelin goal hnih a khung a, Brazil tan vawi 2 inlan ve tawhin goal hnih a khung. Rafinha aiawh tura koh Lucas erawh PSG player pawimawh pawl a ni a, season hman zawh takah khan vawi 55 inlanin goal 13 a khung.

Inrinnia Copa America-a an match hmasa ber Ecuador nena khel tur Brazil hian Benfica goalkeeper Ederson chu ṭhal hliam vangin an chan bawk a, a aiawh tur hian Gremio shot-stopper Marcelo Grohe chu koh a ni.