UEFA Euro 2016 khel lo tur Diarra, Isco, Saul ...

France midfielder Lassana Diarra chu khup hliam vangin Euro 2016 a khel thei dawn lo a, Marseille midfielder aia an koh chu Manchester United midfielder Morgan Schneiderlin a ni.

June 10 aṭanga ṭan tur Euro 2016 khel tur inziah luh hun chu May 31 kha a ni a, player inlan thei tur a chiang tawh. Match hmasa ber khelh hmain squad hi la siksawi theih a ni a, amaherawhchu player inhliam vang chauhin a thlak theih tawh ang. Player inhliam hi team doctor leh UEFA Medical Committee aiawh doctor ten an finfiah a ngai bawk.

France an vanduai

Inelna thlengtu France hian inhliam vangin Raphael Varane leh Jeremy Mathieu aiah Adil Rami leh Samuel Umtiti te an dah lut tawh a, final squad thehluh niah Real Madrid midfielder hlui Lassana Diarra chu inhliam thoin thlak a ngai leh bawk.

Champion lai nge nge

Vicente Del Bosque-a'n probables squad-ah Euro 2012 an champion
ṭuma player Fernando Torres leh Juan Mata te a dah tel lo. Kum 65-a upa Spanish coach-in final squad a puan thlengin khawvel a barakhaih a, Saul Niguez leh Isco te an tel lo.

Thawhlehni chawhma lamah Del Bosque hian player 19 a puang a, hmunruak pali dang chu Champions League final-a inhmachhawn Atletico leh Real player-te'n an inchuh tur thu a sawi. Los Blancos player pahnih Sergio Ramos leh Lucas Vazquez bakah Los Rojiblancos aṭangin Koke leh Juanfran te chu thlan an ni.

UCL Final-a minute 90 chhung khel a, penalty pet goaltu Saul hi Pep Guardiola meuh pawhin Bayern Munich lama a goal khung vangin a lo fak tawh a, amah aia Real substitute leh ram tan pawh la inlan lo Vazquez an ko hian sawi zui a hlawh. Kum 24-a upa Vazquez hi club tana a khelhpui Isco pawhin a tluk lo.