Pro volleyball champion Anastasia

Anastasia VC, Electric Veng chuan league round-a an ngam loh TNT lakah hnehna chang let ve lehin Mizoram Volleyball inelna lian leh ropui ber Zothan Autoworks Pro Volleyball League champion nomawi an chawi. Champion hian Rs. 1,00,000/- dawngin pahnihna hian Rs. 60,000/- an dawng thung.

Thawhlehni zan khan Dengṭhuama Indoor Stadium, Mualpuiah Pro Volleyball final hi khelh niin Anastasia hian 3-1 (25-23, 27-25, 19-25, 25-20) in hnehna an chang. Final-ah hian Anastasia player pawimawh Shiva Singh chu man of the match a ni.

West Bengal aṭanga chah luh middle blocker Shiva hian Pro Volleyball-a Anastasia match zawng zawng a khel kim vek a, an champion theih nana player pawimawh bera chhal ngam a ni.

Anastasia leh TNT te hi May 26, Ningani khan an lo inhmachhawn tawh a, TNT hian 3-1 in hnehna an chang.

Final-ah erawh thil a danglam a, Mizoram pum huap Volleyball inelnaa vawi 49 champion tawh TNT lam hian an game nung tak neih ṭhin kha an chhawn nun theih loh bakah Anastasia attack an dawl zo lo.

Kum 2015-a din chauh ni mah se Anastasia hian sulhnu an nei hrawl nghal hle. Nikum khan Mizoram Volleyball Association hnuaiah inziak lutin second division inelna Season Opening, Winter leh Season Ending Tournament-ah te champion fai vekin an kum khat naah treble champion niin Pro Volleyball League khel tur hian playoff aṭangin an in beng tling a ni.

Hetihlai hian chak zo lo zawk TNT hi an tlachhe duai tihna a ni bik lo, league match vawi nga an khelh aṭangin Hunthar VC chiah hneh loh an nei a, table hmahruaitu ni chungin final hi an inhlangkai.

MVA leh LPS ṭangkawpin an buatsaih Pro Volleyball League hi nakkumah pawh buatsaih chhunzawm leh a ni ang.

Kumina champion Anastasia bakah hian TNT, Hunthar VC leh 3rd Bn MAP te chu Mizorama Volleyball inelna sang ber khel tur hian an tling chhunzawm dawn a, hmunruak dang la awm lua hkhat tur erawh playoff hmanga zawn leh tur a ni ang.

Eng nge an sawi?

Vanglaini palai hnenah champion team a lawmpui thu sawiin TNT coach Lalrindika chuan, "Ni danga kan khelh angin kan khel phak lo a, inkhel pumpui thlir khan a khel chhe zawk kan nih avangin Anastasia khan champion an phu a, kan lawmpui hle a ni. Mizoram hmun hrang hranga min ṭantute duhthusam kan thleng zo lo erawh pawi ka ti a, he hi kan tawpna tur a nih loh avangin kan lo kir leh ang," tiin a sawi.

Pro Volleyball hmasa bera a naute champion puitu Anastasia coach Eric Lalsangliana Pautu chuan, "League round-ah a chak lo zawka kan ṭan tawh avang khan final hmaa inbuatsaihna hun kan neihah kan theihtawp kan chhuah a, kan chak loh ṭhinna lai kan insiam ṭhat theih bakah kan vanneih ni a nih avangin kan champion. Veng mipui min ṭawiawmna a nih bakah a pumpuiah chuan Pathian vang a ni e," tiin Vanglaini palai a hrilh.