Mizoram Premier League khelh tum tan

Chanmari West FC Trial: June 3, Zirtawpni chawhma dar 10:00-ah Chanmari West FC chuan Lammualah an club-a khel duh tan trial a buatsaih dawn a, West Warrior tana khel duh tan chuan tun hi hun ṭha a ni a, football khel thiam tawh phawt tan trial hi a chhim theih.

Chanmari West hian season thar coach atan MPL hmasa bera Dinthar FC champion puitu HC Zarzoliana an la lut a, MPL nomawi chawi ngei tumin ṭan an la nasa hle.

Chhinga Veng FC trial: Aizawl DFA First Division champion Chhinga Veng FC chuan June 6-7, zing dar 10:00 khian Lammualah trial a buatsaih dawn, a duh apiang tan tel theih a ni.

MPL kai thar Chhinga Veng FC hian Dinthar FC coach Lalrem-tluanga chu team enkawl turin an la lut a, Mizo striker ṭha zinga chhiar hmaih theih loh MS Dawngliana an ziak lut tawh bawk. Bawngkawn tlangval Dawngtea hian MPL-ah Chanmari FC a champion pui tawh a, season liam ta khan Bethlehem VT chu I Day Football-ah final a thlen pui bakah MFA Super Cup-ah a champion pui bawk.

Chhinga Veng hian MPL-a an season hmasa berah him an tum ringawt lo a, champion ngei an tum niin a lang.