Champions League Squad of the Season Real leh Atletico player paruk an lang
UEFA Champions League khelh zawh a ni a, Europe-a club inelna sang ber khelh zawh a nih rualin he inelnaa che ṭha zual player 18 thlan chhuah an ni. Champion team Real Madrid leh finalist Atletico Madrid-ten player paruk ve ve thawhin Barcelona (3) Bayern Munich (2) Paris Saint Germain (1)-ten an thawh bawk a, semifinalist zingah Manchester City chu player thawh lo awmchhun an ni.
UEFA Champions League Squad of the Season thlangtute hi UEFA technical team niin Ioan Lupescu (UEFA chief technical officer), Sir Alex Ferguson, Jean-Paul Brigger ,Gines Melendez, Mixu Paatelainen, Thomas Schaaf, Peter Rudbaek, Savo Milosevic, David Moyes leh Mircea Lucescu te chu team member an ni.
Real players paruk
Real Madrid-in defender pahnih Sergio Ramos, Marcelo, midfielder pahnih Toni Kroos, Luka Modric, forward Cristiano Ronaldo leh Gareth Bale an thawh a, player paruk zinga langsar ber chu Ronaldo a ni. Tun season inelna hrang hranga goal 51 khungtu forward hian Real champion-na kawngah goal 16 a khung a, an player pawimawh ber tih loh rual a ni lo.
Spanish club tan tlarhnung lama Sergio Ramos leh Marcelo
ṭangkaina sawi hmaih theih a ni lo a, captain Ramos hian tlarhnung a puih ṭhat piah lamah final-ah goal hmahruai a khung bawk.
Toni Kroos-a'n vawi 952 lai pass dik neiin Champions League khelh zawh taka pass dik nei hnem ber a ni a, Real midfield-a Modric nena an inkawp chu Real tlarhma tan inhnangfakna a ni.
Atletico players
Atletico Madrid-in goalkeeper Jan Oblak, defender Diego Godin leh Juanfran, midfielder Gabi leh Koke bakah tun season-a an player langsar bera chhal ngam forward Antoine Griezmann-te an thawh. French forward hian Champions League khelh zawh takah khan goal 7 a khung a, Atletico-in final an luh theih nana player thawhhlawk a ni.
Goalkeeper Jan Oblak-a'n final-ah veng ṭha tawk lo mah se inelna pumpuiah vawi 13 inlanin goal riat chiah a chhuah a, a hmaa ding zingah Godin leh Juanfran-ten an pui ṭha bawk. Gabi-a'n inelnaah 149,206 m a tlan a, a aia player tlan tam an awm lo. Koke-a'n 141,175m tlanin a aia tlan tam player pahnih aiin match hnihin a khel tlem.
Neymar a tel lo
Barcelona-in semifinal pawh lut zo lo chungin player pathum an thawh a, player pathum zingah Brazil captain Neymar erawh a lang phak lo. Catalan club hian midfielder Andres Iniesta, forward pahnih Luis Suarez leh Lionel Messi te an thawh.
Messi leh Ronaldo rorelna La Liga-a top scorer ni thei Luis Suarez-a'n Barca tan match kua a inlanah goal riat a khung a, tun season inelna hrang hranga match 53 a khelha goal 59 khungtu striker hi a Champions League record sawi hnawm theih hial khawpin inelna dangah a che ṭha!
Argentina captain Messi-a'n hliam vangin group stage match hmasa lam khel lo mah se a inlan hnuah player danglam bik a nihzia tarlangin match sarih a inlanah goal ruk a khung leh hram.
Player dang
Bayern Munich-in player 18 zingah player pahnih chiah an thawh a, an player thawh hi goalkeeper Manuel Neuer leh forward Robert Lewandowski niin sawisel theih a ni lo.
Neuer hian group stage-ah Theo Walcott pet goal tur ropui takin a dang a, match 11 a inlanah goal kua chiah chhuahin khawvela keeper ṭha ber a nihzia a pholang nawn. Poland captain Lewandowski-a'n group stage-a Dinamo Zagreb an hmachhawn ṭumin hattrick a siam a, match 12 a inlanah goal kua a khung.
Paris Saint-Germain-in defender Thiago Silva an thawh a, Europe inelnaa tawnhriat nei tlem club-in quarterfinal an luhna kawngah Brazilian defender hi tlarhnung rinawm a nih piah lamah khelmual chhunga players kaihruaitu ṭha a ni.
Team chu
Goalkeepers : Jan Oblak (Atlético Madrid), Manuel Neuer (Bayern Munich)
Defenders : Diego Godín (Atlético Madrid), Juanfran (Atlético Madrid), Thiago Silva (Paris Saint-Germain), Sergio Ramos (Real Madrid), Marcelo (Real Madrid)
Midfielders : Gabi (Atlético Madrid), Koke (Atlético Madrid), Andrés Iniesta (Barcelona), Toni Kroos (Real Madrid), Luka Modric (Real Madrid)
Forwards : Antoine Griezmann (Atlético Madrid), Luis Suárez (Barcelona), Lionel Messi (Barcelona), Robert Lewandowski (Bayern Munich), Cristiano Ronaldo (Real Madrid), Gareth Bale (Real Madrid)