Serena-i'n quarterfinal lut

Nimin tlai khan world number 1 Serena Williams chuan Elina Svitolina lakah 6-1, 6-1 a hnehna changin French Open quarterfinal a lut. Champion lai Serena hian kumin French Open match li a khelh tawh aṭangin set a la hloh miah lo a ni.

French Open khelh mekah ruah sur vangin inkhelh tam tak a hun sawn a ngai. Thawhlehni zan khan world number 1 Novak Djokovic leh Roberto Bautista Agut ten last 16 an khelh lai pawh ruahsur vang bawkin an zo hman lo.

Grand Slam vawi 11 champion tawh Djokovic hian set hmasa ber hloh mah se a insiam ṭha rang hle a, 3-6, 6-4, 4-1 a nih laiin inkhel hi tihtawp lailawk a ni. Nimin tlai khan Djokovic te hi khelh chhunzawm tura ruahman a ni a, he thu buatsaih lai hian result kan hre hman lo.