Pep laka insawrbing tum lo Mourinho

Manchester United manager thar Jose Mourinho chuan season thar aṭanga Manchester City enkawl tur Pep Guardiola lamah ringawt a rilru a pek chuan a tan tihsual palh a hlauhawm zawk thu a sawi.

Mourinho leh Guardiola hian Real Madrid leh Barcelona an enkawl laia chanchin an lo ngah tawh avangin Premier League-a manager ropui pahnih English club inhal tana an inhmachhawn leh tur hian sawi a hlawh hle. Kum 2011-a Spanish Super Cup-a an inhmachhawn ṭumin Mourinho hian Guardiola assistant Tito Vilanova mitah a lo khawih sak tawh!

Chelsea boss hlui Mourinho chuan, "Pep nen hian league khatah season hnih chhung chu kan lo awm dun tawh a, vawi khat ve ve kan champion. Amahah ringawt ka rilru ka pe a nih chuan ka tan chetsual a awl dawn a, ani pawhin keimah ringawt min ngaihtuah hman lo ang. Chutianga kan ti a nih chuan midang an champion daih mai ang," tiin Premier League-ah ngaihpawimawh tur club dang an tam thu a sawi.

Spain-a manager ropui pahnih an awm chhungin Guardiola-a'n Champions League nomawi bakah FIFA Club World Cup nomawi a chawi a, Spain ramchhung inelnaah erawh an inbuktawk hle. Spain-a kum hnih an inhmachhawn chhungin La Liga, Spanish Cup leh Spa-nish Super Cup-ah te vawi khat ve ve an champion a ni.

Guardiola-a tan City a enkawl hnua a match hmasa ber chu United lakah a ni dawn a, 25 July-ah friendly match khelin Beijing khawpuiah an inhmachhawn ang.

Kum 53-a upa Mourinho hian Thawhṭanni khan a vawi khat nan Manchester United training ground a tlawh a, club legend Sir Bobby Charlton nen an inhmu. Hetihlai hian United assistant manager Ryan Giggs a dinhmun erawh a la chiang lo hle, Mourinho hian hun rei tak chhung a assistant manager lo ni tawh Rui Faria chu Old Trafford-ah hruai a tum a, United legend Giggs hi a la titi pui lo.

Mourinho hian tun season tawp ruala a contract hmang zo tur midfielder Michael Carrick chu United-ah kum khat dang cham tura contract thar zawrh a tum nia sawi a ni bawk.