Pep-a lakluh hmasak ber Gundogan

Manchester City-in Borus-sia Dortmund aṭangin Germany midfielder Ilkay Gundogan an la lut a, Spanish manager Pep Guardiola hnuaia an player lakluh hmasa ber a ni.

Kum 25-a upa Gundogan la lut tur hian City-in Bundesliga club hi pound maktaduai 20 bawr vel an pe a, German midfielder hian kum li atan contract a ziak.

Tu nge Gundogan?

Euro 2016 khel tur Germany squad-ah Ilkay Gundogan hi khup hliam vangin a tel lo a, zai a tawh avangin Premier League ṭantirh lamah pawh a inlan dawn lo. Heti chung hian khawvel coach hlawh hnem ber (ṭha ber?) Pep Guardiola-a'n man to takin a la lut duh a, chu chuan Gundogan thiam dan tur chu a sawifiah chiang hle.

October 24, 1990 khan Ger-many khaw pakhat Gelsenkirchen-ah Gundogan hi Turkish nupa inkarah a piang a, professional football career a ṭanna club chu VfL Bochum II (reserve team) a ni.

Germany midfielder hian kum 2009 khan VfL Bochum
aṭangin 1. FC Nurnberg a zawm a, club thar tana match li a khelhnaah FC Bayern Munich an hmachhawn ṭumin assist hmasa ber a nei a, kum hnih hnuah Borussia Dortmund-in euro maktaduai liin an la lut.

Dortmund-ah Gundogan-a'n hmun pawimawh a chang nghal a, Bundesliga leh DFB Pokal-ah a champion pui nghal. 2012-13 season-ah Champions League final an thleng a, Bayern Munich lakah goal khung mah se 1-2 in an vanduai. 2013 DFL Supercup-ah German club lian pahnih hi an intawng leh a, Gundogan hian goal a khung bakah Dortmund a chak pui bawk.

2013-14 season-ah Gundo-gan tan hun ṭha a inher chhuak tura ngaih a ni a, amaherawhchu beisei angin thil a thleng lo. Inhliam vangin Bundesliga match khat chiah a khel a, 2014 FIFA World Cup champion Germany team-ah a tel lo.

Gundogan-a'n ngai a awh har a, 2014-15 season-a Dortmund talbuai chhanah pawh a ngaih theih. Season liam ta kha chuan Germany midfielder hian ngai a awh tawh tih a lang a, Bundesliga-a an tluk loh chu Bayern Munich chiah a ni. May thla tir khan Gundgogan hi a inhliam a, a tel lohna DFB Pokal final-ah Dortmund an vanduai a, Bayern an chak.

Engtin zel?

Gundogan hian midfielder-in a neih tur zawng zawng chu a neiah a ngaih theih a, defence puih paha ball sem a thiam ang chiahin tlarhma lam puituah a
ṭha hle. Germany midfielder hian ball pass a thiam a, a thawhrimna hi chu Jurgen Klopp-a hnuai aṭanga a zirah a ngaih theih a, Thomas Tuchel hnuaiah hma a sawnah a ngaih theih bawk.

Amaherawhchu Liverpool-ah Dortmund midfielder Nuri Sahin a hlawhchham a, Manchester United-ah Shinji Kagawa a che fuh tawk lo. Hei vang hian Gundogan-a hmalam hi hriatthiam a har a, mah se amah enkawl tur hi Pep Guardiola a ni. Spanish manager hnuaiah hi chuan Germany midfielder hi a dam ṭha a nih ngat chuan Premier League-a a hlawhchham ai chuan a hlawhtlin theihna chance a sang zawk.

Eng nge an sawi?

Manchester City zawmtu Ilkay Gundogan chuan, "Pep Guardiola nen kan thawk dun thei tur hi ka lawm a, season thar atana City player lakluh hmasa ber ka ni hian minti phur bawk. Chona tam tak hmachhawn tur a awm dawn a, England leh Champions League-a kan champion theih nan ka theihna zawng zawng ka chhuah ang. Ka chanchinah bung thar ka kai a, City nen hian hun hlimawm kan tawn chhoh ngei ka ring tlat a ni," tiin chona hmachhawn a châk tawh thu a sawi a, a club Dortmund chungah lawmthu a sawi tel bawk.

Kum 25-a upa Gundagon hian kum nga chhungin Dortmund tan match 157 a khel a, Germany tan vawi 16 inlanin ram tan hian goal li a khung tawh.

City Director of Football Txiki Begiristain chuan, "Team tichaktu atana Ilkay kan lak luh theih avangin club board chu kan lawm a, kan player pawimawh a nih chhoh ngei ka beisei tlat a ni," tiin a sawi.