Euro 2016 Thiam si, khel phak bawk si lo!
June 10 a lo her chhuak ang a, football ngainatuten France lam an hawi ṭhup ang - Euro 2016 khelh a nih dawn vang a ni. Europe khawmualpuia football thiam ram 24-ten a thiam ber nih an inchuh dawn.
Euro 2016-ah hian football ngainatute hmuh chak zawng zawng chu a kim vek tura ngaih a ni a, hetihrual hian player mal anga langsar leh ṭan bik hlawh tham 'player' zingah Euro khel lo tur an awm nual avangin inelna ṭan hma hauhin fans tam tak lawm a kim lo.
Goalkeeper
Kevin Trapp (Germany)
I khelhna club chu ram chhung inelna zawng zawngah champion pui la, Champions League-ah quarterfinal thlenpui bawk la, Euro-ah ram aiawh tura thlan i nih loh chuan mak i ti ve tho ang! Hei hi a ni Paris St-Germain goalkeeper Kevin Trapp-a chanchin chu. Kum 25-a upa keeper hian season hman zawh takah match 25 chhung goal chhuah lo bawk mah se Germany boss Joachim Low-a'n Manuel Neuer (Bayern Munich), Bernd Leno (Bayer Leverkusen) leh Marc-Andre ter Stegen (Barcelona)-te a duh zawk avangin Euro 2016 a khel dawn lo.
Defender
Mamadou Sakho (France)
Liverpool defender Sakho-a'n damdawi hman phal loh a hmang nia ngaiin UEFA-in ni 30 chhung an chhui a, chhui a nih chhungin inkhelh phalsak a ni lo. Kum 26-a upa defender hi chhuichian a nih hnuah a fihlim tih hmuhchhuah a ni leh si a, Euro khel tura a zalen thu UEFA-in sawi mah se defender chawl rei hi ram aiawh tlakah coach Didier Deschamps-a'n a ngai lo.
Dejan Lovren (Croatia)
Liverpool a pan tirhah Lovren-a'n beisei phak lo mah se Jurgen Klopp-a'n Reds a enkawl hnuah player pawimawh pawl a ni a, kum 26-a upa defender hi Croatia tan vawi 31 inlan tawh bawk mah se coach Ante Cacic nen an inhmuhthiam loh avangin France-ah hruai a ni lo.
Midfielder
Javi Martinez (Spain)
Kum 27-a upa midfielder hian Bayern Munich chu league leh Cup-ah champion puiin Champions League semifinal hial hruai thleng mah se Spain coach Vicente del Bosque rilru hmin turin a tawk zo lo.
Danny Drinkwater (England)
England squad-a kum 26-a upa defensive midfielder telh a ni lo hian sawi a hlawh a nih pawhin a mak lo. Leicester City-in Premier League nomawi an chawina kawngah player pawimawh a ni a, March thlaa England tana a match hmasa berah man of the match-a thlan nghal a ni. Hetichung hian Roy Hodgson-a'n hliam damkawr Jordan Henderson leh Jack Wilshere a ring zawk a, France tui tlan turin Drinkwater-a zinchhuak dawn ta lo.
Andrea Pirlo (Italy)
Kum 37-a upa midfielder hian Italy tan match 116 lai khel tawhin major tournament pariatah ram aiawh tawh mah se kum 2014-a ram tan inkhelh a chawlhsan hnua a rilru thlak tirtu manager Antonio Conte-a'n MLS lama kal ta midfielder hi Euro 2016-ah mamawhin a inhre tlat lo.
Forward
Hatem Ben Arfa (France)
Newcastle leh Hull-a a beidawn hnuah Ben Arfa-a'n Ligue 1 club Nice tan vawi 36 inlanah goal 18 khung mah se France-in kum 29-a upa winger khelhnaa khel turin Antoine Griezmann, Anthony Martial leh Dimitri Payet-te an neih tho avangin coach Didier Deschamps-a ngaihtuahna Ben Arfa-a'n a ti buai pha lo.
Isco (Spain)
Euro qualifying round-ah Spain tan regular takin Isco inlan mah se Euro 2016 a thlen meuh chuan Real Madrid attacking midfielder tan Spain squad-ah hmun a awm lo. Del Bosque-a'n Koke a thlan vangin mak tih hlawh lo mah se season hman zawh taka Real tana vawi 43 inlan Isco aia vawi 32 chiah inlan Lucas Vazquez-a thlang kher erawhin mak tih a hlawh hle.
Juan Mata (Spain)
Spain tan vawi 41 a inlana goal 10 khungtu attacking midfielder hi Euro 2016 khel tura beisei ni mah se Manchester United season hman chhiat a tuar a, players langsar engemaw zat enkantu Del Bosque-a'n tun season-a United tan vawi 54 a inlana goal 10 khungtu hi Spain squad-ah telh ṭul a ti lo.
Diego Costa (Spain)
Kum 2013 khan Brazilian striker hian Spain khua leh tui nihna a neih vang maia an ram hnuchhawnin Spain tan khelh thlang zawk lo se chuan tunah hian Copa America khel tur Brazil squad-ah a awm ngeiin a rinawm. Season bul ṭan ṭha lo striker hian goal 16 nen season chawhnu lamah duhawm takin season khar mah se Del Bosque-a'n Spain tan vawi 10 a inlana goal 1 chiah khungtu striker hi Spain kawr ha tlakah a ngai lo.
Karim Benzema (France)
Real Madrid tan season khatah match 36 khela goal 28 i khung a nih chuan eng ram tan pawha khel phak tur i ni - mahse Karim Benzema erawh khelmual pawn lama a chanchin duhawm lo avangin Deschamps-a'n thlan loh a thlang zawk a, kum 28-a upa striker hian an ramah Euro a khel dawn lo a ni.
Fernando Torres (Spain)
Club leh ram football-a chawimawina dawn theih ang zawng zawng dawngtu striker hian Atletico Madrid-ah Liverpool-a a thiamna ang kha nei let leh mek mah se duhthlan tur ngah inti Del Bosque-a ngaihtuahna a ti buai pha lo a, season hman zawh taka goal 12 khungtu striker tan Spain-ah hmun a awm lo.
Players dang
Belgium coach Marc Wilmots-a'n Everton winger Kevin Mirallas leh Tottenham Hotspur winger Nacer Chadli-te tel loa ṭha tawkah a inngai a, Serie A hman zawh taka complete dribbles (126) ngah ber Palermo midfielder hmuhnawm Franco Vazquez tan Italy-ah hmun a awm lo bawk, France coach Deschamps-a'n kum 19-a upa Ousmane Dembele chu ram aiawh turin a la naupang hret niin a ngai.
Arsenal winger Santi Cazorla tan Juan Mata tel phak lohna Spain squad-ah hmun a awm bik lo a, Denmark midfielder Christian Eriksen leh Netherlands winger Arjen Robben-te pawh an ramin Euro 2016 an khelh phak loh miau avangin France-ah kan hmu dawn lo - heng ho mah mah a lang phak lo!