Copa America Centenario Opening match-ah USA Vs Colombia

South America ramte tana football inelna sang ber Copa America chu kum 1916 aṭang khan khelh ṭan a lo ni tawh a, kumin hi kum 100-na chiah a ni. Hemi pual hian Copa America Centenario chu USA-ah neih a ni dawn a, kum 100 tlin lawmna a nih avangin a vawi khat nan inelna hi South America ram pawnah neih a ni.

Opening match hi naktuk zing dar 7:00-ah inelna thlengtu USA leh Colombia ten Levi's Stadium-ah an khel dawn. Copa America hi ram inelnaa a tlukpui European Championship te angin khawvel huapin lar pha lo mah se player khel turte enin dah hniam theih a ni lo - khawvel player ṭha ber ang hiala sawi Lionel Messi, Luis Suarez, Arturo Vidal, James Rodriguez leh player ṭha tak tak inlanna a ni tlat.

Kum 100 lawmna

Kum 1916-a Copa America ṭan a nih khan team pali Uruguay, Argentina, Brazil leh Chile te chiah an tel a, Uruguay an champion hmasa ber.

Hun hmasa lamah inelna khelh hun bithliah felfai tak a awm lo a, hetih hunlai hian South American Championship tih a ni. Kum 1975 aṭangin Copa América tiin thlak a ni a, ṭantirh lamah kum li danah neih ni mah se a hnu lamah chuan inelna kar danah kum hnih chauh te a tla leh a, kum zawn erawh chuan khelh a ni tawh lo.

Kum 2007 aṭang khan kum li danah khelh a ni leh a, inelna neih hnuhnun ber ṭum chu nikum kha a ni. Tarlan tawh angin tun ṭum chu a 'special' a, amaherawhchu kum-in cham-pion hian 2017 FIFA Con-federations Cup an khel lo ang. Khawmualpui hrang hrang cham-pion inelnaah hian 2016 champion Chile an tel chiang tawh.

Copa America Centenario-ah hian CONMEBOL (Foot-ball-a South American thuneitu) leh CONCACAF (Football-a North, Central America leh Ca-rib-bean thuneitu) ten inrem-na an siam a, kum danga team 12 ni ṭhin kha team 16 an tel ang.

Group ṭhen dan

South America lamin tun
ṭumah hian team 10 an thawh a, North America lamin team ruk an thawh thung. Group pali a awm ang chiahin seeded pali siam a ni a, Argentina, Brazil, Mexico leh United States te chu seeded team an ni.

Group A-ah United States, Colombia, Costa Rica leh Paraguay te an awm a, Group B-ah Brazil, Ecuador, Haiti leh Peru te awmin Group C-ah Mexico, Uruguay, Jamaica leh Venezuela te an awm a, Group D-ah Argentina, Chile, Panama leh Bolivia te an awm.

Group tin aṭangin a sang pahnihin quarterfinal an lut ang a, point inang an awm a nih chuan goal difference en tur a ni. Hemi hnu pawha an la intluk a nih chuan goal khung tam zawk en tur a ni a, chumi hnu pawha dinhmun ṭha zawk an la awm lo a nih chuan team intlukte inkhelh tawhna aṭangin en tur a ni.

Levi's Stadium

Opening match khelhna tur Levi's Stadium hi kum 2014 aṭang khan American football club San Francisco 49ers chuan home match khelh nan an hmang. He stadium hi kumin February thlaa Super Bowl 50 khelhna a ni a, mipui leng zat chu 68,500 niin 75,000 leng tura siam danglam theih a ni.

Mak ang reng tak chu he stadium-a mipui pungkhawm tam ber chu WrestleMania 31 (March 29, 2015) kha a ni a, mipui 76,976 zetin wrestling hi an en. Levi's Stadium-ah FC Barcelona leh Manchester United ten nikum khan friendly match an nei tawh a, kumin July 20 hian AC Milan leh Liverpool FC te an inkhel ang.

Opening match

USA leh Colombia te hi vawi 17 an intawng tawh a, an inkhelh hnuhnung ber chu kum 2014 daih tawh khaniin hemi ṭum hian Craven Cottage, London-ah Colombia 2-1 in an chak. Copa America-ah vawi hnih an inhmachhawn tawh a - 1995 khan third place zawnnaah Colombia 4-1 in an chak a, 2007 khan group stage-ah Colombia hi 1-0 in an chak.

Jurgen Klinsmann-a enkawl USA hi FIFA ranking-ah 29-naah an awm a, mualneitu an nih bawk avangin tun hi Colombia hneh theihna hun ṭha a ni. USA tan captain kum 28-a upa Michael Bradley leh kum 33-a upa Clint Dempsey te chu tlarhma lama an innghahna an ni a, kum 17 leka upa ni chunga Borussia Dortmund tana vawi 9 inlana goal hnih khung thei midfielder Christian Pulisic hi chhinchhiah lawk a ṭha ang. Dortmund midfielder hi USA tana goal khung naupang ber a ni a, kum 17 leh ni 253 leka upa a nihin ram tan goal a khung tawh.

Jose Pekerman-a kaihhruai Colombia hi FIFA ranking-ah palina an ni a, goal khung turin James Rodriguez, Carlos Bacca, leh Juan Cuadrado te an neih avangin quarterfinal lut ngei tura rin an ni. USA-in point thum an hmu a nih chuan team ṭha lo zawk an chakah a ngaih theih ang.