Di Maria-a'n champion inbeisei

Copa America Centenario khel tura inbutsaih mek Angel Di Maria chuan tun ṭum chu Argentina champion hun a nih ve tawh ngei a beisei thu a sawi chhuak.

Argentina hi team ṭha tak ni mah se an vannei tawk lo a, FIFA World Cup 2014 final-ah Germany chu Mario Gotze goal khat khung hmangin an hneh lo. Brazil-a an chak lo aṭanga thla 12 pawh a liam hmain Copa Amerca-ah final an lut leh a, mahse final-ah a thlengtu Chile chu penalty shootout hmangin an hneh lo leh bawk.

Paris Saint-Germain winger Di Maria hi Germany an hneh loh ṭum hian hliam vangin a inlan ve lo a, Chile an hneh loh ṭum pawh hian a malpui na vangin first half tawp hmain thlak a ngai bawk.

Kum 28-a upa Di Maria chuan final khelh a duh thu sawiin, "Ka duh ber pakhat chu harsatna nei miah loa final khelh theih a ni. Kan team-ah player ṭha tak tak an awm nual a, kan theihtawp kan chhuah a nih chuan final kan khelh ngei pawh ka beisei," tiin a sawi.

Argentina hian an match hmasa ber atan June 6 khian Chile an hmachhawn nghal dawn a, Group D-ah Panama leh Bolivia te an hmachhawn zui leh ang a, a sang pahnihin quarterfinal an lut ang.

Champion a duh thu sawi chhunzawmin Di Maria chuan, "Inelna lian kan hmachhawn hnuhnung pahnihah khan champion phu khawpin kan khel ṭha a, mah se a vanduai zawkah kan ṭang. Football-ah chuan kan duh leh beisei anga thil a thlen loh chang a awm fo a, kan pawm thiam a ṭul ṭhin. Kumin hi chu kan tan kum ṭha leh chhinchhiah tlak a nih ve tawh ngei ka beisei," tiin a sawi bawk.