Spain tan Nolito bawk a langsar

Nilaini zan khan Spain chuan Nolito leh Alvaro Morata-te goal hnih thun chhawr ṭangkaiin South Korea chu friendly match-ah 6-1 in an sawp a, Euro 2016 khel tur ramte tan enliam mai chi an nih loh zia an pholang nawn.

South Korea manager Uli Stielike-a'n Spain an hneh theih thu sawi mah se match kaw chhung goal chhuah loa an ram record siamtu South Korea hi Spain hmaah dawl zawrin an zawr a, tih theih an nei tam lo.

Spain tan minute 30-na lekah David Silva-a'n freekick aṭangin goal ropui a khung a, minute hnih a liam hman awrh tihin goalkeeper Kim Jin-hyeon tihsual nangchingin Cesc Fabregas chuan goal hnihna a chhunzawm ve bawk.

Bosnia-Herzegovina laka 3-1 a an chak ṭuma goal hnih khungtu Nolito chuan goal hnih dang (38' & 54') khung ve lehin Alvaro Morata chuan goal hnih (50' & 89') a khung ve bawk. Korea tan Ju Se-jong chuan minute 83-naah goal khung ve mah se awmzia erawh a nei thui lo.

Spain coach Vicente del Bosque chuan, "Kum li liam ta khan Euro-ah kan lo champion tawh a, kuminah pawh rinkai ber kan ni. Champion tum ngam team dang awm mah se Euro nomawi chawi leh ngei hi kan duhthusam chu a ni," tiin a ṭawng pawr nghal hle.

Match 11 chhung hneh loh tawng loa kaltluang tawh Spain hian karleh Thawhlehniah Euro hmaa an match hnuhnung berah Georgia an hmachhawn leh dawn a, Euro 2016-a an match hmasa ber chu June 13-ah Czech Republic nen an khel ang.