Hliam vangin Nadal buai chhunzawm

Ban rek na vanga French Open aṭanga a inhnuhdawh hnuah Rafel Nadal hliam a dam mai thei lo a, June 13 aṭanga 19 inkara khelh tur Aegon Championship-ah pawh a inlan thei dawn ta lo.

Kum 29-a upa Nadal chuan, "British mipuite hmaa inkhelh hi nuam ka ti a, tennis an ngaina hle tih pawh ka hria. Tun hmain Queen's Club-ah hian ka lo champion ve tawh a, he hmuna hlawhtlinna chan leh hi ka chak hle," tiin a sawi.

Wimbledon inbuatsaih nana an hman ṭhin Aegon Championship-ah hian Nadal hi kum 2008 khan a lo champion tawh a, hemi kum hian Grand Slam pali zinga grass court-a an khelh awmchhun Wimbledon-ah hian a champion zui nghe nghe.

Grand Slam vawi 14 champion tawh Nadal hi hliam vangin a buai ngun ta hle a, kum 2009 khan a khup na vangin Wimbledon nomawi a humhim thei lo a, 2008 Beijing Olympics-a gold medal a dawn pawh London 2012-ah khan hliam vang bawkin a humhim thei lo leh bawk.

Nadal-a banrek na hi chawlhkar hnih chhung vela dam hman tura beisei ni mah se rin aiin a dam chak lo niin a lang a, Wimbledon-ah erawh a inlan theih beisei a ni.