French Open Gasquet hnehin Murray-a'n semifinal a lut

Andy Murray chuan French Open champion nomawi a chawi dawn a nih chuan hna hautak tak a paltlang a ngai dawn. Britain number 1 Murray hian Nilaini zan khan Richard Gasquet hnehin quarterfinal a paltlang a, vawiin tlai dar 5:00 hian semifinal-ah champion lai Stan Wawrinka nen an inhmachhawn leh dawn a ni.

Roland Garros, Paris-a in-khelah world number 2 Murray hian khawtual tlangval dam la awm chhun Gasquet lakah set khatna hloh mah se player ṭha zawk a nih zia a lantir a, game an khelh hnuhnung 15 zinga 13 zet lain darkar thum leh minute 23 chhungin 5-7, 7-6, 6-0, 6-2 in hnehna a chang.

Murray leh Gasquet te hi tun hmain Grand Slam tournament-ah vawi li an inhmachhawn tawh a, Murray hian hnehna a la chang vek. Kumin hi Gasquet-a'n an rama tennis inelna sang bera quarterfinal a vawi khat luhna ni mah se an ram mipui beisei leh duhthusam a thlentir zo lo. Kum 1983-a Yannick Noah-a'n French Open champion nomawi a chawi hnuah he hmunah hian khawtual player an la hlawhtling leh lo.

Kum 29-a upa Murray hian tun hnai a match hnuhnung 10-ah hnehna a chang vek a, thla hmasa khan Italian Open-ah a champion nghe nghe. Tun
ṭum hi French Open semifinal a vawi li luhna niin Grand Slam tournament-ah quarterfinal vawi 19 a paltlangna chiah a ni a, major tournament-ah hian ṭum hnih chiah a la champion thung.

Gasquet lakah Murray hian double fault vawi li ngawt a nei a, a service hmasa chu 70% chauh dikin unforce errors vawi 40 tehmeuh a nei bawk, a khelh ṭhat ber ṭum a ni lo. A insiam ṭha thuai a nih loh chuan player langsar dang lakah buaina tham a ni.

Inkhel hautak a nih thu sawi-in Murray chuan, "Tournament ṭan ni aṭang khan nuamsa taka chak ka la nei lem lo, ka inkhelh apiangin tihsual ka ngah ṭhin a, insiam ṭhat ka mamawh takzet. Gasquet hi player ṭha berte zinga mi a nihna a rei tawh a, eng hunah pawh ani hmachhawn hi thil awlsam a ni ngai lo," tiin a sawi.

Court Suzanne Lenglen lama inkhelah seeded pathumna Wawrinka chuan set hmasa pahnih darkar khat pawh tling loa a lak hnuah set hnuhnung berah talbuai ve deuh mah se Spain tlangval Albert Ramos-Vinolas chu harsa lo takin 6-2, 6-1, 7-6 in a hneh ve bawk. Kum 31-a upa Wawrinka hi Roland Garros -ah chuan player hlauhawm leh khelṭha tluang ber pawl a ni rih a, match li a khelh tawh aṭangin set khat chiah a la hloh hial.

Grand Slam vawi hnih champion tawh ve ve Murray leh Wawrinka te inkhel tur hi tennis ngainatute hmuh châk ni dawn. ATP hnuaia inelna hrang hrangah Murray hian Wawrinka lakah vawi riat hnehna chang tawhin vawi sarih a chak lo zawkah ṭang thungin record a nei ṭha hret. Mahse, tun hnai an intawn hnuhnung pathumah erawh Wawrinka a chak vek thung.

Major tournament a khelh hnuhnung vawi ruk aṭanga ṭum li semifinal lut thei Wawrinka chuan, "Paris-a inkhelh hi nuam ka ti em em a, ka ball vuak a dikin inrintawkna ka nei sang hle. Semifinal-ah Murray nen kan inhmachhawn dawn a, inkhelh hmuhnawm leh ngaihnawm tak a ni ang. Ani hian tun hnai hian clay-ah hma a sawn nasa hle a, ka inven uluk pawh a ngai ang," tiin fimkhur taka a khelh chhunzawm tur thu a sawi.

Wawrinka chuan sawi chhun-zawmin, "Kan inkhelh tawhna zawng zawng thlir kir chuan Murray hian hnuhma a nei ṭha zawk a, player ṭha pali zinga awm reng thei a nih vang hian khawvela ṭha berte zinga mi a ni tih a chiang. Chutih rualin kei pawh hi ka ṭhat dan bera ka khelh chhuah theih chuan hnehna chang thei tur ka ni," tiin a sawi tel bawk.

Hei le Djokovic!

Philippe Chartier Court-ah Thawhlehni khan world number 1 Novak Djokovic leh Roberto Bautista Agut ten last 16 an khelh laiin ruah sur vangin inkhel tihtawp a ni. Nilaini tlai khan khelh chhunzawm leh niin Djokovic hian 3-6, 6-4, 6-1, 7-5 in hnehna a chang. An inkhelh ṭum hnih belhkhawm hi darkar thum leh minute 16 a rei ni. Nizan khan quarterfinal khelh chhunzawm nghalin David Ferrer hnehtu seeded pasarihna Tomas Berdych nen an inhmachhawn leh a, result kan hre hman lo.

Kum 29-a upa Djokovic hi Australian Open, Wimbledon leh US Open-ah te champion kim vek tawhin Grand Slam inel-naah hian vawi 11 a cham-pion tawh. Mahse, Roland Garros-ah hian final vawi thum khel tawh mah se a la hlawhlting lo vek thung! Kuminah hian a champion thei a nih chuan khawvela player ṭha pariat ten an lo tih theih tawh Grand Slam palia champion kim theite huangah a hming a chuang ve dawn a ni.

Semifinal a luh chiah khan Djokovic hian tennis chan-chinah hnuhma ropui pakhat a hnutchhiah leh phawt. Grand Slam inelnaah semifinal vawi 28 a luhna chiah niin Jimmy Connors (27) record a khum chiah a, semifinal lut hnem ber Roger Federer (36) chiah tluk loh a nei tawh.

Seeded pakhatna Djokovic chuan, "Ruah sur vangin inkhelh chawlh lailawk a ngai a, a tuka inkhel tura kal leh a ngai hi chu thil awlsam tak a ni lo. Mahse, tun hma pawhin hetiang thil hi chu a lo thleng tawh ṭhin a, nakinah pawh a la thleng zel maithei," tiin a sawi.

Djokovic hian French Open quarterfinal a luh chiah hian tun hma lama tennis inelna danga a lawmman dawn nena belh khawmin US dollar maktaduai 100 a dawng tling dawn. Tennis player zingah lawmman aṭanga sum hailut hnem ber a ni.

Inkhel dangah seeded 12-na David Goffin chuan Ernests Gulbis lakah 4-6, 6-2, 6-2, 6-3 in hnehna a lo chang ve bawk a, Marcel Granollers hnehtu Dominic Thiem nen nimin tlai khan quarterfinal an khel zui ve bawk.