Euro 2016 Premier League player an tam ber
Euro 2016 khelh turah English Premier League-in player an thawh hnem ber. France-ah ram 24-in Europe-a roreltu nih an inchuh dawn a, team tinin player 23 ṭheuh neiin player zawng zawng zat chu 552 a ni.
Players 552 zinga 103 chuan Premier League-ah football hmangin ei an zawng a, Euro 2016 khel tur player zinga 20% zet chu Premier League-a khel tihna a ni. Germany Bundesliga-in player 57 thawhin league zinga player thawh hnem ber pahnihna an ni a, Europe club inelna champion Real Madrid leh Sevilla neitu Spain league-in player 34 chiah thawhin pathumna an ni thung.
Euro 2016 hi English football dinhmun sanzia pholanna pakhat a ni - Premier League hnuai chiah Championship division pawhin player 31 lai an thawh a, inelna thleng tur France league sang ber Ligue 1 aiin an thawh hnem a, La Liga an phak lohna chu player pahnih chiah a ni!
Liverpool & Juve
Club zingah Liverpool leh Juventus chu player thawh hnem ber an ni a, Europe club ropui pahnih hian players 12 ve ve an thawh a, pahnihna Tottenham Hotspurs-in player 11 thawhin pathumna Manchester United-in player 10 an thawh thung.
Champions League nomawi chawi hlim Real Madrid-in player pariat chiah an thawh a, Europe-a club langsar zingah Barcelona leh Bayern Munich chuan player pakua ve ve an thawh - Turkish club Fenerbahce pawhin club lian pahnih thawh zat hi an thawh.
Reds player
Liverpool-in player 11 an thawh a, an player thawh zing-ah England squad-a tel an tam ber. Midfielder pathum James Milner, Adam Lallana leh Jordan Henderson, striker Daniel Sturridge leh defender Nathaniel Clyne-te chu England squad-ah hian an tel.
Wales-ah midfielder Joe Allen leh goalkeeper Danny Ward, Slovakia captain Martin Skrtel, Germany midfielder Emre Can, Belgium goalkeeper Simon Mignolet, forward Divock Origi leh Christian Benteke te chu Liverpool player vek an ni.
Old Lady player
Juventus-in France defender Patrice Evra leh midfielder Paul Pogba, Switzerland captain Stephan Lichtsteiner, Germany midfielder Sami Khedira, Spain forward Alvaro Morata, Croatia striker Mario Mandzukic-te thawhin Italy squad-ah captain Gianluigi Buffon, defender pathum Giorgio Chiellini, Andrea Barzagli leh Leonardo Bonucci, midfielder Stefano Sturaro leh forward Simone Zaza-te an thawh bawk.
Player thawh hnem lama pahnihna Tottenham chuan France captain Hugo Lloris, England defender Kyle Walker leh Danny Rose, midfielder Eric Dier leh Dele Alli, striker Harry Kane, Wales defender Ben Davies, Belgium defender Toby Alderweireld leh Jan Vertonghen, midfielder Mousa Dembele, Austria defender Kevin Wimmer-te an thawh a, Premier League lama an season hman ṭhatin Euro 2016-a an player-te dinhmun pawh thui tak a hril niin a lang.
English club
Premier League champion Leicester City-in player pali an thawh a, France midfielder N'Golo Kante, England striker Jamie Vardy, Wales midfielder Andy King leh Austria captain Christian Fuchs-te chu an player thawh an ni.
Manchester United-in France forward Anthony Martial, midfielder Morgan Schneiderlin, England captain Wayne Rooney, defender Chris Smalling, forward Marcus Rashford, Germany captain Bastian Schweinsteiger, Northern Ireland defender Paddy McNair, Spain goalkeeper David de Gea, Belgium midfielder Marouane Fellaini, Italy defender Matteo Darmian te an thawh a, an season hman dan ngaihtuahin player an thawh chhe lo.
Club dang
Bayern Munich-in France midfielder Kingsley Coman, Germany goalkeeper Manuel Neuer, defender Jerome Boateng leh Joshua Kimmich, midfielder Mario Gotze, forward Thomas Muller, Poland captain Robert Lewandowski, Spain midfielder Thiago leh Austria defender David Alaba-te an thawh.
Barcelona player zingah Germany goalkeeper Marc-Andre ter Stegen, Spain defender Gerard Pique, Marc Bartra, Jordi Alba, midfielder Sergio Busquets, Andres Iniesta, Turkey captain Arda Turan, Croatia midfielder Ivan Rakitic, Belgium defender Thomas Vermaelen-te chu France-ah an inkhel dawn bawk.
Real Madrid-in Wales forward Gareth Bale, Germany midfielder Toni Kroos, Spain defender Sergio Ramos, forward Lucas Vazquez, Croatia midfielder Mateo Kovacic, Luka Modric, Portugal captain Cristiano Ronaldo, defender Pepe-te an thawh ve bawk.
Player thawh hnem club
12 - Liverpool, Juventus
11 - Tottenham Hotspur
10 - Manchester United
9 - Bayern Munich, Barcelona, Fenerbahce
8 - Arsenal, Roma, CSKA Moscow, Real Madrid, Basel
7 - Southampton, Besiktas, Dynamo Kiev, Shakhtar Donetsk
6 - Dinamo Zagreb, Viktoria Plzen, Chelsea, Everton, Manchester City, Ferencvaros, Napoli, Zenit Saint Petersburg
5 - Stoke City, Borussia Dortmund, Fiorentina, Legia Warsaw, Krasnodar, Lokomotiv Moscow, Bursaspor, Galatasaray