Chanmari FC-ah MS-a a kir

MPL2 best player R. Malsawm-tluanga'n Aizawl FC chhuahsanin a club hlui Chanmari FC a zawm.

Chanmari FC-in MPL an champion hnuah kum zawnin final lut leh mah se Aizawl FC lakah an tlawm ve ve a, tun season-ah Federation Cup finalist hnen aṭangin MPL nomawi lak let an tum hle. I League zawh rualin MS-a a chhuak dawn tih thawm a awm tawh a, Federation Cup final a khelh loh hnuah phei kha chuan Aizawl FC-ah a awm zel a rinawm tawh loh.

MS-a hi MPL3 season tawp hmain club chhung buaina vangin Chanmari FC a chhuahsan a, midfielder ṭha inlan lohna final-ah Aizawl FC an chak zawk. Darlawn midfielder hian MPL3 champion hi a zawm a, Spanish coach Manuel Retamero hnuaiah hmun pawimawh changin MPL4-ah an champion.

I League-ah erawh MS-a aiah captain David Lalrinmuana dah pawimawh zawk a ni a, chutichung chuan match riatah a la inlan tho. Aizawl FC captain David-a'n Mumbai City FC a zawm avangin MS-a hi MPL champion-in chelh tur angin sawi mah se MPL club dang aṭangin sawmtu a ngah a, a tawpah a club hlui Chanmari FC a thlang.

Chanmari FC chuan an midfielder hlui an la let thei chu an lawm thu sawiin, hmasawn pui ngei an inbeisei thu an sawi bawk.