Bundesliga Player of the Year Aubameyang

Germany-a football player intel-khawm pawl German Professional Football Player Union (VDV) chuan Bundesliga season hman zawh taka player ṭha ber an thlang a, Borussia Dortmund striker Pierre-Emerick Aubameyang chu Player of the Year-ah thlan a ni.

African Footballer of the Year-a thlan lo ni tawh bawk Aubameyang hian Bundesliga player ṭha ber ni tur hian Bayern Munich striker Robert Lewandowski chu vote 0.2% in a khum a, an inthlauhna hi a tam lo hle.

Season hman zawh taka league match 31 a inlana goal 25 khunga assists vawi ruk neitu striker chuan, "Ka players puite ngeiin ka hnathawhte hriaa min chawimawi hi a lawmawm takzet a, he lawmman hi Dortmund-a mite zawng zawng leh kan fans ropui takte tan ka hlan a ni," a ti.

Inelna hrang hranga match 46 a inlana goal 39 khungtu striker hi kum 1998-a VDV awards sem a nih aṭanga African zinga he chawimawina dawng thei hmasa ber a ni a, African player zinga Bundesliga team of the year-a lang thei hmasa ber a ni bawk.

2015/16 Bundesliga team of the season:

Goalkeeper: Manuel Neuer (Bayern Munich)

Defenders: Mats Hummels (Bayern Munich), Jerome Boateng (Bayern Munich), David Alaba (Bayern Munich), Philipp Lahm (Bayern Munich)

Midfielders: Thomas Müller (Bayern Munich), Henrikh Mkhitaryan (Dortmund), Douglas Costa (Bayern Munich), Arturo Vidal (Bayern Munich)

Strikers: Robert Lewandowski (Bayern Munich), Pierre-Emerick Aubameyang (Dortmund)