England-in Ronaldo tel lohna Portugal hneh

Ningani zan khan England-in Wembley Stadium-ah hun tawp dawna Chris Smalling-a goal hmangin Portugal 1-0 in an hneh. Mikhual team tan captain Cristiano Ronaldo chu hahdamtir a nih avangin a inlan lo a, minute 35-na lekah Bruno Alves chu hnawhchhuah a ni bawk.

Roy Hodgson-a hoten Euro 2016 atana warm up match awm angte chu an khel zo ta a, June 11 zan dar 12:30-ah Russia nen European Championship-a an match hmasa ber an khel ang. Portugal erawhin inelna
ṭan hmain friendly match khelh tur an la nei a, June 8 hian Estonia an hmachhawn ang.

Red Card leh Goal

England-in goal khung turin captain Wayne Rooney, Harry Kane leh Jamie Vardy te an dah a, Australia lama chakna goal khungtu leh Premier League-a che ṭha striker pahnih hian goal-ah vawi hnih chiah an pet.

Minute 35-na lekah Fenerbahce defender Alves-a'n English striker Kane-a lu zawnah a tlawh a, Tottenham striker hi inhliam na lo mah se Portgual defender chetdan a hlauhawm avangin hnawhchhuah a ni.

English mipuiin an pla-yer-te chungah beisei an nei sang a, player 10-a khel Portugal tlarhnung an ṭhiah hleih theih loh avangin an media lamin an tlarhmate chungchang an sawi zui nasa. Minute 85-naa Raheem Sterling-a cross chu Smalling-a'n ram tana a goal hmasa ber ni turin tauh lut mah se Roy Hodgson-a hoten English mipui an tilawm zo lo.

An sawi zui?

Goal a luh miau loh avangin Wayne Rooney chung-chang sawi thar leh a ni a, England captain hi striker turin a ṭha tawk loah ngaitu an tam. Sawi zui theih erawh midfield-a khel tur pawhin a
ṭha tawk em tih hi a ni.

Kane leh Vardy an him zo bik lo a, Spurs leh Leicester star player-te hi an inthlawp ṭha tawk lo. Tun hma deuha Steven Gerrard leh Frank Lampard te ram tana an inkawp fuh theih tlat lohte pawh a ang rum rum a, tun
ṭumah erawh buaina hi mid-field ni loin forward a ni tawh.

Hogdson-a'n a rem fuh tawk lo a ni thei a, mah se England boss-in 'Formation ni loin player-in team an chak pui ṭhin' tiin ṭan hmun a khuar a nih pawhin hnial theih a ni lo. England hian Portugal an hneh tlat.

Eng nge an sawi?

England manager Roy Hodgson chuan, "Player 10-a khel khelhpui hi a har letling a, goal venhim chauh an tum tawh ṭhin avangin awmze neia khelh a har tawh ṭhin a ni. Player-te an thawkrim a, a zawna vawi thum kan chakna a nih avangin kei chu kan result-ah hian ka ka lawm. Portugal hi FIFA ranking-ah keini aia sang an ni," tiin inkhel chungchang a sawi.

Player rem dan tur a la chian bik loh thu sawiin England boss chuan, "Player 11 ka thlang tawh em? a khel tur thlan chhuah hi a harsa a ni. Duhthlan tur player ṭha 16 aṭanga 17 ka nei a, hetiang thlan tur ka nei hi ka lawm a ni," a ti.

Egnland captain Wayne Rooney chuan, "A tawp thlengin theihtawp kan chhuah a, chu chu kan chak-na chhan chu a ni. Kan khelh ṭhat loh ṭumah pawh kan chak a, chak zel tur erawh chuan hmasawn kan mamawh ang," tiin insiam-
ṭhat an mamawh thu a sawi.