Serena-i'n Steffi Graf a hnaih tawh

Champion lai Serena Williams tan Steffi Graf record nihrual turin French Open nomawi kawl lai humhim a tawk. Ningani zan khan Serena hian Yulia Putintseva lakah hnehna changin semifinal a inhlangkai leh ta.

Court Philippe Chatrier-a in-khelah world number 1 Serena hi a talbuai hman hle a, set khatna chu 5-7 in a hloh nghal phawt a! Set hnihnaah pawh 4-4 ni lehin Putintseva hian point nga chauh pawh hmuh belh leh se hnehna chang thei dinhmunah a ding. Mahse, Serena chuan a ze pangngai chhuahin darkar hnih leh minute kaw chhungin 5-7, 6-4, 6-1 in hnehna a chang ta zawk a ni.

Kum 34-a upa Serena hi Aus-tralian Open, French Open, Wimbledon leh US Open-ah te a champion vek tawh a, Grand Slam tournament-ah hian vawi 21 champion tawhin German hranghlui Steffi Graf-i record (22) chu a nihrual theihna hun a nei mek.

American star Serena chuan, "Pu-tintseva khan beisei phak bakin a rawn khel ṭha a, a chak lo zawka ka ṭan ka ring hman hial. Semifinal ka thleng hi chu ka vanneih vang chauh a ni," tiin a sawi.

Serena hi a khelh ṭhat ber ni a ni lo a, set hmasa berah chauh pawh unforced errors vawi 24 ngawt nei-in baseline
aṭanga ball vaw thiam Putin-tseva lakah a talbuai hman hle a ni.

Hmeichhe single quarterfinal inkhel dangah seeded pawh chang phak lo Kiki Bertens chuan seeded pariatna Timea Bacsinszky chu 7-5, 6-2 in a lo hneh ve bawk. Nizan khan Bertens leh Serena hi semifinal-ah an inhmachhawn zui a, semifinal lehlamah seeded palina Garbine Muguruza leh seeded 21-na Samantha Stosur an inhmachhawn ve bawk a, result kan hre hman lo. Pathianni zan hian final khelh tur a ni ang.