NBA Finals, Game 1 Champion lai Warriors an chak phawt

Golden State Warriors chuan tun dinhmunah khawvela NBA team ṭha ber an nihzia an lantir leh ta phawt. Nimin zing khan 2016 NBA Finals Game 1 khelh niin Cleveland Cavaliers lakah 104-89 in hnehna an chang.

Thawhṭanni zing dar 5:30-ah Game 2 khelh leh a ni ang.

MVP Stephen Curry leh Klay Thompson ten nidanga an khelh anga ṭhain khel phak lo deuh mah se Andrew Bogut chu inkhela danglamna thlentu a tih theih a, a dan pangngaiin Draymond Green chu Warriors kulhpui a ni leh bawk.

Cleveland tan MVP vawi li lo ni tawh LeBron James chu player pawimawh leh langsar ber niin point 23 a score bakah rebounds vawi 12 a la a, assists vawi kua nei bawkin triple-double a neih lohna chu assist vawi khata a neih tlem vang chauh a ni.

Oracle Arena, Oakland-a inkhelah a tir aṭangin Steve Kerr a naute a che fuh hmasa zawkah an ṭang a, first half-ah 52-43 in hma an hruai. Mahse, quarter thumnaah Cavaliers lamin thapui rawn thawh ve lehin quarter zawh nan minute hnih leh second 12 chauh a awm tawh tihin 68-67 in an rawn lehthal leh hman! Amaherawhchu, Warriors an talbuai rei lo a, quarter hnuhnung ber an khelh zawh meuh chuan point 15 zetin an sang zawk.

Point guard Curry leh shooting guard Thompson te point hmuh belhkhawm chu point 20 chauh ni mah se Draymond Green-a'n point 16 a score bakah rebounds vawi 11 lain block vawi khat a nei bawk. Bogut chu court chhungah minute 15 chauh inlan mah se Warriors point score hmasak 16 zinga point ruk chu a score niin reverse layup, tip-in leh alley-oop dunk ropui tak a lantir. Australian center hian point score tuma vawi sarih a vawm aṭangin ṭum nga ngawt a lut a ni.

Kyrie Irving, Kevin Love leh Tristan Thompson te lo dangchat thei tura a naute remkhawmtu Warriors coach Kerr chuan, "Kumtluana kan chakna hnar pakhat tia ka sawi ṭhin chu kan defence phui ṭha hi a ni a, chu chiah chu vawiinah pawh khan kan chakna chhan a ni leh, kan khingpuite ṭhatna lai kan chhu chat thei a nih chuan kan tan kawng a inhawng ṭhin," tiin a sawi.

Ball an hloh nasat thu sawi-in Cleveland coach Tyronn Lue chuan, "Team ṭha kan hmachhawn a nih chuan holam tak taka ball hloh a thiang lo a, kan chetsual zeuh kha point-ah an chantir zel avangin fimkhur a ngai hle. Game 2-ah chuan kha ai khan kan khelh ṭhat tawh ka beisei," tiin turnover vawi 15 zet an neih chu an chak loh chan phakhat niin a sawi.