France tan fiahna hnuhnung

Euro 2016 thlengtu tur France chuan zanin dar 12:30 hian Scotland an lo mikhual dawn a, major tournament an thlen hmaa an inbuatsaihna match hnu-hnung ber a ni tawh ang.

Didier Deschamps-a naute hi Euro thlengtu an nih avang hian quali-fying an khelh a ngai ve lo a, friendly match khel-in ram pariat an hmachhawn aṭangin England chiah an hneh lo. An match hnuhnung berah Cameroon chu 3-2 in hneh mah se a zawnin match thum chhung goal hnih an chhuah avangin inenfiah an ngai hle.

Lassana Diarra in-hliam vangin Manchester United midfielder Mor-gan Schneiderlin chu France tana inlan tura koh leh hnuhnawh a ni a, ani bakah hian N'Golo Kante, Yohan Cabaye leh Moussa Sissoko te tan Euro-a in-khel bulṭantu ni thei tura an theihna phochhuahna hun ṭha a ni ang.

Champions League final an khelh vanga Cameroon an hmachhawn ṭuma inlan lo Atletico Madrid forward Antoine Griezmann chu a inkhel thei tawh dawn a, An-thony Martial malpui na a dawm tawh avangin Deschamps-a'n a duh a nih chuan a chhawr thei tawh bawk dawn a ni.

France hian an striker rinrawl Karim Benzema chu khelmual pawn lama buaina a neih avangin an ko tel lo a, Arsenal hmatawng Olivier Giroud tan inkhel bulṭan beiseina a sang sawt. Gunners stri-ker hian Cameroon an hneh ṭumin goal hmahruai a khung a, ram tan match 48 a khelh tawh aṭangin goal 15 a khung tawh a ni.