Pathianni zingah Brazil inlan dawn

Copa America Centenario chu tukin zing hian Levi's Stadium, California-ah khelh ṭan a ni a, opening match-ah inelna thlengtu USA leh Colombia te an inhmachhawn.

Pathianni zing dar 7:30-ah Brazil an inlan dawn a, Dunga kaihhruai Selecao khingpui tur hi Ecuador a ni. Group B inkhel dangah Haiti leh Peru te zing dar 5:00-ah an inkhel ang a, zanin dar 2:30 hian Costa Rica leh Paraguay te an inkhel ang.

Pathianni zan aṭangin Group C inkhel hmuh tur a awm ang a, dar 2:30-ah Jamaica leh Venezuela an inkhel ang a, Thawhṭanni zing dar 5:30-ah Mexico leh Uruguay te an inhmachhawn ang.

Dunga hote

Brazil tan an inkhelhna tur stadium Rose Bowl, California hi hmun pawimawh a ni a, helai hmun hi 1994 FIFA World Cup final-a Italy an hnehna hmun a ni.

Selecao boss Dunga-a'n a player zinga lar ber Neymar chu Olympic khelh duh zawk vangin a chhawr thei lo. Tel thei tura beisei Douglas Costa, Kaka, Luiz Gustavo, Rafinha, Ricardo Oliveira leh Ederson te chu inhliam vangin thlak a
ṭul a, Wallace, Ganso, Jonas leh Lucas Moura te chu koh leh hnuhnawh an ni.

Dunga chuan, "Ka player
ṭhenkhat hi kum lam en chuan an la naupang a, amaherawhchu anmahniah theihna nasa tak a awm a ni. Tun hi an tan hun ṭha a ni a, Brazil tana khelh an phu tih an lantir tur a ni," tiin a sawi.

Brazil hian Copa America hmaa friendly match hnuhnung berah Panama chu 2-0 in an hneh a, goal khungtu chu Benfica forward Jonas leh Santos forward Gabriel Barbosa te an ni. Kum 19-a upa Gabriel hian ram tan a vawi khat khelhnaah goal a khung a, ani bakah hian São Paulo defender kum 22-a upa Rodrigo Caio leh a rualpui Atlético Mineiro left back Douglas Santos te chu ṭha chho zel tura beiseiawm an ni.

Brazil hian Copa Ameri-ca hnuhnung pahnihah quar-terfinal an paltlang zo lo a, amaherawhchu hemi hma tournament panganaah vawi li an champion. An khingpui tur Ecuador erawh an thlen san ber ṭumin palina bak an phak lo a, amaherawhchu Antonio Valencia (Manchester United), Jefferson Montero (Swansea City), Enner Valencia (West Ham United) leh Miler Bolaños (Gremio) te awmna hi awlsam taka hneh theih a ni lo ang.

Uruguay tan Suarez?

Uruguay-in FC Barcelona striker Luis Suárez an kawl a, amaherawhchu La Liga top scorer hi Copa del Rey final-a Sevilla an hneh ṭumin a malpuiah hliam a tuar a, Mexico an hmachhawn hunah inlan lo thei a ni.

Liverpool striker hlui Suarez tel lo pawhin Óscar Tabárez-a'n Paris Saint-Germain stri-ker Edinson Cavani bakah tawn-hriat nei ṭha Atletico Madrid defender Diego Godin leh Getafe defender Alvaro Pereira te an kawl avangin awlsam takin Group C chu an paltlang thei ang a, mah se champion erawh a harsa ang.

Uruguay hmachhawn tur Mexico hi FIFA ranking-ah 16-naah an awm a, champion tura rinkai an ni pha. Nikum October thlaa Juan Carlos Osorio-a'n Miguel Herrera a thlak a, Mexico hian match 11 chhung chu hneh loh an tawng tawh lo. Coach thar Osorio hnuaia match hnuhnung paliah goal an chhuah lo.

Mexico hian tlarhmaah Bayer Leverkusen striker Javier "Chicharito" Hernandez an kawl a, midfield-ah Hector Herrera leh Andres Guardado an nei a, tlarhnungah Paul Aguilar, Rafael Marquez, Hector Moreno, leh Miguel Layun te an kawl bawk. Uruguay leh CONCACAF Gold Cup champion Mexico inkhel tur hi a hmuhnawm ngei a rinawm.