Germany tan insiam- ṭhat hun

Zanin dar 9:30 hian Veltins Arena-ah Germany-in Hungary an mikhual dawn a, Euro 2016 hmaa an friendly match hnuhnung ber a nih avangin Joachim Low hote tan insiamṭhatna hun ṭha a ni.

2014 FIFA World Cup champion Germany hian Euro qualifier khelh zawh hnuah friendly match vawi li an khel tawh a, vawi khat chiah an chak. World champion hneh loh hi Euro 2016 thlengtu tur France, England leh Slovakia te an ni a, 2006 FIFA World Cup semifinal-a an hneh loh Italy erawh 4-1 laiin an hneh thung.

Slovakia an hneh loh ṭumin Low-a'n player ṭha ber a luhtir lo a, zanin inkhel tur erawh Euro 2016 a tel tur zawnna ni loin an ṭhat theih dan ber tur zawnna a ni tawh ang.

Bayern Munich forward Thomas Muller chuan, "Kan tumah kan chiang a, France-ah chawlh hmang turin kan zin dawn lo. Champion tumin kan kal dawn a, inelna hmachhawn turin kan phur tawh a ni," tiin a sawi.