India-in Mizo tlangval hmangin Laos an hneh Jeje-a'n Mizo mipui tan a goal khung a hlan
New Laos National Stadium-ah Jeje Lalpekhlua'n goal awm chhun a khung a, kum 2013 hnuah a vawi khat nan ram pawnah India National football team an chak.
2019 AFC Asian Cup khel tur zawnna Playoff Round 1-ah India-in Ningani zan khan khualmualah Laos an hmachhawn a, Jeje goal hmangin 1-0 in an chak.
June 7 khian Guwahati-ah second leg khelh a ni ang a, India hian an draw theih chuan team 24 awmna third round an lut ang.
India tan Jeje
Stephen Constantine-a'n India jersey ha turin Mizo pakhat chiah a thlang a, a thlan chhun erawh team innghahna a ni. Hnahthial tlangval Jeje hi tlar hmaah Bengaluru attacking duo Sunil Chhetri leh Udanta Singh te nen an awm.
Mohun Bagan striker Jeje-a'n minute 10 chhungin chance vawi hnih a nei hman a, mah se a hun ṭha neih pahnihah hian assistant referee-in offside vang--in flag a phar ve ve.
First half-ah India-in ball an chang tam a, goal hmaah erawh a tihngaihna tak an hre lo. Halftime hma hretin Jeje leh Chhetri te thawhrah chu midfielder Eugeneson Lyngdoh-a'n goal-ah a chantir thei lo.
Second half ṭan aṭanga minu-te kuanaah Manipuri forward tlan chak Udanta cross chu Jeje-a'n a tauh lut a, Mizo tlangval goal khung bak hi goal dang a luh belh lo.
Malpui hliam vangin minute 71-naah Jeje-a lakchhuah a ni a, Mizo tlangval aia lut chu Sporting Goa forward Sumit Passi a ni. Injury time-ah Laos tan Moukda Souksavath cross chu India defender-te aia zuang sang Khampheng Sayavuthi-a'n a tauh a, keeper Gurpreet Singh-a'n ban pha lo mah se goal sirah a kal hlauh.
Mizo tan Jeje
Chakna goal khungtu Jeje chuan, "Ka goal khung hi Mizo mipui tan ka hlan a, India leh Mizo tana theihtawp chhuah hi ka tih tur a ni," tiin Vanglaini palai a hrilh.
An la chak chian loh thu sawiin Jeje chuan, "Interna-tional match hi chu a harsa phian zel. Team ṭha lo zawka kan ngaih pawh hi khelh an har vek a, ram tan a nih tawh chuan player-te hian theihtawp an chhuah ṭhin. Kan dinhmun chu a ṭha zawk ngei a, mah se kan la chak chiang lo," tiin a sawi.
India dinhmun
India hian September 9, 2013 khan Maldives chu goal khatin an hneh a, hemi hnu hian khualmualah Afghanistan, Nepal, Guam, Turkmenistan, Oman leh Iran-te hmachhawn lehin chak hmel an hmu lo.
Mizo tlangval hmangin India-in khualmualah hnehna an chang a, 2019 AFC Asian Cup khel tur zawnna third round lut turin an dinhmun a ṭha hle.
India hi Guwahati-ah an chak lo palh a nih pawhin third round luh theih dan kawng a awm tho a, Laos hi an hneh lo a nih chuan third round lut turin Maldives leh Yemen inkhela chak lo zawk an hmachhawn ang.