French Open Djokovic-a'n semifinal a lut

World Number 1 Novak Djoko-vic chuan Tomas Berdych 6-3, 7-5 6-3 a hnehin Ningani zan khan French Open semifinal a lut a, Grand Slam semifinal vawi 30 a luhna chiah niin major tournament palia champion kim thei player pariatna nih a tumna chu a chhawm nung zel.

Inkhel dangah seeded 13-na Dominic Thiem chuan seeded 12-na David Goffin chu 4-6, 7-6, 6-4, 6-1 in a lo hneh ve bawk a, Austrian tlangval Thiem hian Grand Slam semifinal a vawi khat luhna niin nimin tlai khan Djokovic nen an in-hma-chhawn zui leh a, he thu buat-saih lai hian result kan hre hman lo.

Mipa semifinal lehlamah champion lai Stan Wawrinka leh world number 2 Andy Murray te an inhmachhawn bawk a, final hi ruahman dan chuan Pathianni zana khelh tur a ni.

Grand Slam vawi 11 champion tawh Djokovic hian French Open final a zawnin kum thum a khel tawh a, Rafael Nadal vawi hnih a hneh loh hnuah nikum khan Stan Wawrinka a hneh lo leh bawk. Serbian thiampuipa hi tun hnaiah a khel ṭha tluang viau a, major tournament-ah hian a zawnin match 26 chhung hnehna a chang tawh. Kumin French Open bikah hian match nga a khelh tawh aṭangin set khat chiah a la hloh a ni.

Kumin French Open hi a ni hmasa ber aṭangin ruah surin a ti buai nghal a, inkhelh hun ṭhenkhat sawn a ngaih ngun deuh avangin player ṭhenkhat chuan chawlh pawh nei loin a ni zawnin an khel hial. Djokovic te inkhelh lai pawh hian ruahin a tibuai leh deuh a, Berdych chuan a chak loh chhanah ruah sur hi a puh nghe nghe.

Seeded pakhatna Djokovic hian Berdych hi a ngam ve hrim hrim a, tun hnai an intawn hnuhnung 11-ah a hneh vek bakah an inkhelh tawhna zawng zawngah vawi 24 hneh tawhin vawi hnih chiah a chak lo.

Kum 29-a upa Djokovic hian set thumna-a game hnihna an khelh laiin a racquet a paih a, endiktu (line umpire) a fuh teuh hle. Racquet hian endiktu hi fuh chu nise Djokovic hi disqualify theih a ni!

A vanneih thu sawiin Djokovic chuan, "Racquet kha leiah ka paih a, a tleng khan line umpire kha fuh teuh tak zet a, sawi tur dang a awm lo - a fuh loh hlauh avang khan ka vannei takzet a ni," tiin a sawi. Player nungchang dangdai ve tak Djokovic hian thla hmasaa Rome Masters final-a Andy Murray a hneh loh
ṭumin a racquet a lo paih tawh bawk.

Kum 30-a upa Berdych chuan, "Paris-a inkhelh hi nuam ka ti ṭhin a, mah se vawiin chu khaw awmdan vang khan inkhelh a harsa ka ti. Hnehna chang turin kawng zimte chu ka nei ve chuan ka hria a, ka vanneih ṭum a ni lo," tiin a sawi.

Czech Republic star Berdych hian kum 2010 khan Roland Garros-ah hian semifinal a lo lut ve tawh a, hemi ṭum hian Robin Soderling a hneh lo. Hemi hnu hian he hmunah hian a sang pali zingah a la inhlangkai leh lo a ni.