NBA champion hnem ber Boston Celtics: A vawi 18 nan nomawi an chawi ta

Boston Celtics chuan mellung thar an phun - a vawi 18 nan NBA champion an ni! Basketball inelna lian leh ngaihhlut bera champion tam ber ni tur hian Dallas Mavericks chu nimin zing khan 106-88 in an hneh.

Celtics hian best of seven series chu 4-1 in an la a, nomawi chawi tam lama record inṭawm an neih pui Los Angeles Lakers (17 titles) chu kalsanin a chung berah an awm fal ta a ni.

An chungnung

NBA champion nih puitu Celtics coach Joe Mazzulla hi kum 35 mi chauh la ni a, a sulhnu erawh a hraw ta hle. Muzzulla chuan, "Hringnungah hian ropui turin hun tam i nei lo, mitin hian remchang nei mah ila remchang kan nei tam vek lo.

"Mahni bakah ṭhiante nen thawhhona ṭha a pawimawh a, chu chu tun ṭumah hian kan hmu," a ti. A naute a khelhtir dan leh team a enkawl dan nen pawh a thusawi hi a inmil hle, season tharah pawh an hmuhnawm dawn.

Game hmasa pathum an la a, nuamsa taka chak thei niin an lang. Dallas Mavericks mualah vawi khat an va chesual ve zauh a, tunah chuan an khelmual hman thiam TD Garden-ah ngei mai anmahni ṭantute nen champion an lawm.

Nimin zing game 5 inkhelah Jayson Tatum chuan a thawhhlawk leh takzet - point 31 a neih bakah assist ṭum 11 neiin double-double a nei a, ani bakah hian Brown (21 points), Jrue Holiday (15) leh Derrick White (14) te an langsar bawk.

A tir aṭangin Celtics hian inkhel an thunun a, chawlhlawk an hman laiin 67-46 zetin hma an hruai fal tawh; tlakhniam leh hnungtawlh em em lai nei loin an tum ram an thleng a, nuamsa takin hnehna an chang tia sawi ngam a ni.

Dallas an chuai

Luka Doncic an nei a, Slovenian star hi NBA regular season hman laia point nei tam ber kha a ni - mimal chuan hmachhawn châkawm loh tak a ni. Mahse, game pawimawh khelh laia foul tam vanga hrem pawh a lo tawk zauh tawh.

Game 5 bikah point 28 neiin a chungnung viau a, amaherawhchu chak nan a tawk zo lo. Amah thlawptu Kyrie Irving chuan point 15 nei ve bawk mah se Boston Celtics kal dang tur chuan a bei tham lua deuh, pahnihnaah an lungawi a ngai.

Kum 25 mi Doncic chuan, "Nomawi inchuhna inkhelah a vanduai zawk kan ni a, kan chhe ta duai tihna erawh a ni bik lo. Season tluan maiin ṭha takin kan khel a, ka khelh pui player bakah coach leh min ṭantute chungah kan lawm," a ti.

Doncic ang bawkin Irving tan pawh hun duhawm loh a ni. Irving hian kum 2019 khan Boston Celtics hi a chhuahsan a, tun ṭuma a team hlui a hmachhawn lehnaah pawh hian mipui lam aṭanga auelna a dawng hnem angreng hle a, beisei angin a khel chhuak ta chiah lo bawk.

Irving chuan, "Celtics player-te hi an awmkhawm rei tawh a, an inpawhin an inman hle. Kan tihsual hlekah min hrem nghal zel a, tun ṭumah chuan anni dang turin kan ṭha tawk lo deuh a ni," tiin a club hlui a fak a, an champion a lawmpui thu a sawi bawk a ni.