Jayson Tatum hun a thleng

Player ṭha leh theihna nei sang bik zinga mi a ni a, mahse NBA champion a nih theih mai loh avangin Jayson Tatum hian sawisel a tawk nasa ṭhin. Tunah erawh Boston Celtics a champion pui a, amah sawisel ṭhin tute chu nomawi hmangin a chhang let.

Kum 26 mi Tatum chuan, "Zinkawng thui leh ngaihnawm tak chu a ni, tun hun thleng tur hian kan nghak rei hle. Player chauh kan ni lo, khelmual pawn lam aṭanga tawp chin nei loa min thlawp ṭhintute vangin NBA champion kan ni tih ka hria.

"Sawiselna leh thu lengvak tam tak chu a la awm chhunzawm zel ang, mahse chutiang sawi ṭhinte chuan kan champion hi an sawi ve a ngai ang," a ti. A club hmangaih Boston Celtics tana NBA champion nih chu a hlu zual ngei ang.

Kum 2017 khan Tatum hian Celtics tan a khel ṭan a, basketball inelna lianah hian club dang tan a la khel ngai lo. NBA All-Star zingah vawi nga ngawt a tel tawh a, a kum a la tam loh avangin champion nomawi dangin a zui leh ngei pawh a rinawm.