MVP chu Jaylen Brown

NBA Finals 2024 Most Valuable Player (MVP) atan Boston Celtics champion puitu Jaylen Brown thlan a ni a, mimal chawimawina dawng mah se a ṭhiante leh a bik takin Jayson Tatum chuan fak a phu tih a sawi.

Brown hian season ṭha tak a hmang chungin All-Star zingah a tel lo! Tunah erawh inelna boruak sang leh pawimawh laiah player ṭha a nihna a takin a lang a, mimal chawimawina hial a hlawh chhuak.

Game 5 bikah Brown hian point 21 a nei, rebound vawi riat lain assist ṭum ruk a nei bawk. Statistics chauh ni loin court chhunga brouak a siam vel leh Dallas Mavericks player ṭha ber Luka Doncic a hmachhawn dante chu hmuhnawm tak a ni.

Kum 27 mi Brown chuan, "NBA Finals MVP hi kan team hlawhchhuah a ni a, kawng engkima ka kianga ding Jayson Tatum nen kan inṭawm, ani hian season tluanin hetiang ka nih theih nan min pui," tiin Tatum a dahsang thiam hle.