France an chak, Mbappe hnar ruh a tliak

Euro 2024-ah champion rinkai France-in Thawhṭanni zan khan Austria an hmachhawn a, Austrian defender Maximilian Wober-a'n an lama a tihluh zarah 1-0 in an chak. Group D-ah Netherlands leh France ten point thum ve ve an hmu a, ram ṭha pahnih hi June 21, Zirtawpni zan dar 12:30-ah an inkhel ang.

Zirtawpni zan dar 9:30 hian point la hmu lo pahnih Poland leh Austria te an inkhel dawn bawk. Group khat aṭangin team pathum tan last 16 luh theih dan a awm avangin inkhel zawng zawng a pawimawh vek.

Kante telna France

France-ah Mbappe bakah Champions League-a Real Madrid champion puitu Eduardo Camavinga leh Aurelien Tchouameni te hming a langsar. Mahse, Real duo Camavinga leh Tchouameni te aia Didier Deschamps-a thlan zawk chu kum 33 mi N'Golo Kante a ni.

Kante hi Adrien Rabiot nen midfield laiah an inkawp a, tlarhmaah Mbappe chu a hmasa berah awmin Marcus Thuram, Antoine Griezmann leh Ousmane Dembele ten an thlawp. Tlarhnungah Arsenal chhuanvawr William Saliba chu Dayot Upamecano nen an inkawp a, mual sirah Theo Hernandez leh Jules Kounde te an awm.

AC Milan goalkeeper Mike Maignan chu France goal veng a ni a, kil tinah Les Bleus an ṭha. Bench-ah pawh hming langsar ṭhahnem tak an intlar ṭha bawk.

Austria hi Ralf Rangnick-a enkawl an ni a, Borussia Dortmund midfielder Marcel Sabitzer leh Bayern Munich midfielder Konrad Laimer te chu an player zinga langsar an ni.

Danglamna 'Own Goal'

Dusseldorf Arena-ah France-in champion rinkai an nih chhan lantir turin hun an mamawh rei lo a, Rabiot ball pek chu captain Mbappe-a'n chak takin mual sir aṭangin a la lut. Season thara Real Madrid tana khel tur Mbappe hian chance ṭha hmasa a hlah.

Les Bleus goal bawh a na a, Hernandez pawhin Austria tlarhnung a rum ṭhaih. Mahse, maw! Austria-in chance ṭha bik an hlah. Captain Sabitzer-a'n Christoph Baumgartner tan ball duhthusam a pe a, RB Leipzig forward hi goalkeeper Mike Maignan-a'n a tibuai hman.

France an vannei zui a, minute 38-naah Dembele leh Mbappe te mual dinglamah an inthlawp ṭha. Mbappe hian a thiamna leh tlan chakna hmangin petna tur khawp a insiam a, a cross ball chu Maximilian Wober-a'n an lamah a tauh lut. First half-ah 1-0 a ni.

Boruak a ṭang

Second half-ah inkhel a nung chhunzawm a, inkhel ṭan chiahah Griezmann chu mual sira an innekna lamah tluin advertisement board tauh mah se a hliam na lo. France bawkin chance ṭha an nei a, Mbappe-a'n a theihna sang tak pholangin a tlan chak zarah goalkeeper chauh a hmachhawn a, goal zawnah a pet lo!

Mbappe-a'n chance ṭha bik a hlah avangin Austria-in beiseina an neih phah a, inkhel a nung phah hle. France keeper Maignan a che ṭha a, Austria chance ṭha neih tur a dang thei zel.

Hun tawp dawn hnaiah Mbappe ball tauh tur chuan Kevin Danso dar a tauh a, a hnar ruh a tliak a, thlak a ngai bawk. Kante telna France-in goal venhim hna an thawk ṭha a, goal an venhim ṭhat avangin 1-0 in hnehna an chang.

Mbappe dinhmun

French Football Federation-in inkhelh banah Mbappe zai a ngaih dawn loh thu an puang a, mahse Zirtawpni zana Netherlands nen an inhmachhawn tur atan a dinhmun a chiang lo thung.

Inkhelh banah Dusseldorf damdawi inah hruai a ni a, a hnar ruh a tliak tih nemngheh a ni. FFF hian Mbappe khelh theih dan tur an zawng a, a pual bikin hmai kawr an siamsak ang.

Didier Deschamps chuan, "Thuchiang lo sawi ka duh lo. Thudik chu, Mbappe tel hian kan ṭha zawk. Chutihrualin a khel thei lo a nih chuan, a tel loin theihtawp kan chhuah ang," tiin a sawi. Mbappe hian World Cup-ah goal 12 khung tawh mah se Euro C'ship-ah goal a la khung miah lo.

Kante chu

Khawvelin Mbappe an thlir ṭhup a, Kante-a'n hming chher nan a hmang. Deschamps-a'n kum hnih hnuah France tana khel turin Kante a ko let a, a tirah chuan mak tih a hlawh - tunah chuan a koh chhan a chiang.

Saudi Pro League club Al-Ittihad midfielder Kante hian inkhelh ṭan phat aṭangin midfield-ah hna ṭha tak a thawk a, Austria-in chance an insiam loh nan a dang chat hnem hle.

Chutihrualin Kante hi kum 33 mi a ni tawh a, match tinah ṭha takin a khel thei zel ang em, tih chu hunin a hril dawn. An match hmasa berah erawh Kante a khel ṭha a; World Cup, Premier League, Champions League leh Europa League thlenga chawi tawh player a nihna a lang.