Charity match ticket a lei theih ta

MFA leh Mizo Professional Footballers Association (MPFA) ṭangkawp chuan Cyclone Remal vanga chhiat tawkte ṭanpui nan Charity Match a buatsaih dawn a, ISL leh I League-a Mizo player-te June 21, Zirtawpni hian RG Stadium-ah an inkhel ang.

Ticket hi lei theih turin an chhawp chhuak tawh a, en man hi Rs 100 chauh a ni dawn. Mizo footballer langsarte hi India ram club ṭhaah an khelh hlawm avangin TV-ah lo chuan an khel en tur a vang hle. RG Stadium-ah an tak ngeiin an chevel en theihna hun ṭha a awm dawn a, inkhel en a châkawm tawh takzet.

ISL lamin India chhuanvawr Lallianzuala Chhangte an thawhchhuahpui dawn a, khelmuala Lalengmawia Ralte (Apuia) nen an inthlawp tur chu hmuhnawm a tling ang. An khelhpuiturte hi Isak Vanlalruatfela leh K. Lalṭhathanga (Puitea) te an ni dawn a, football hmuhnawm an khel thei ang.

I League lamin Edmund Lalrindika an kawl a, champion team Mohammedan SC-a khel captain Zodingliana bakah Lalbiakhlua Jongte, Vanlalzuidika, Samuel Lalmuanpuia leh David Lalhlansanga te an awm. Player dang ṭha ṭhahnem tak an awm a, tualchhung football tui tan chuan hmaih phal chi a ni lo.