David-a'n East Bengal a zawm

Indian football-a striker ngaihven hlawh thar, Vairengte tlangval David Lalhlansanga chuan Indian Super League club East Bengal a zawm - kum thum chhung atan contract a ziak.

David-a hian season hman zawh takah khan Mohammedan SC tan a khel a, Durand Cup leh Calcutta Football League-ah top scorer niin, an player pawimawh a ni.

Aizawl FC aṭanga inchher hriam David-a hian Durand Cup-ah khan match thum khela goal ruk khungin assist vawi khat a nei a, top scorer a ni. Calcutta Football League-ah phei chuan goal 21 khungin top scorer a ni chiang hle.

David hian I League-ah pawh a hming a chher zui. Match 22-ah goal nga khungin, assist vawi hnih a nei a, ISL an inpetkai theih nan player pawimawh a ni.

Aizawl FC striker hlui David-a hian Mohammedan-ah hian kum khat chiah contract neiin, a hmang zo a, Kolkata club hian chelh duh mah se East Bengal zawm a thlang ta zawk.

David-a chuan, "Min dawrtu chu an awm ve nual a, mahse, East Bengal hian min ngam huai ber a, min duh ve tak tak nia ka hriat avangin ka zawm ta a ni," tiin Vanglaini a hrilh.

East Bengal striker hi tun international break-ah khan India coach ban tak Igor Stimac chuan India squad-ah a vawi khat nan a ko a, khelmualah a la lut rih lo thung.