Zanin aṭangin Super 8 khelh ṭan a ni dawn
T20 Cricket World Cup Super 8 chu zanin aṭangin khelh ṭan a ni dawn. Zanin dar 8:00 hian United States leh South Africa te an inkhel ang a, June 20, Ningani zing dar 6:00-ah champion lai England leh inelna thlengtu West Indies te an inkhel leh ang.
Super 8-ah hian team pariat chu group pahnihah ṭhen an ni a; group A-ah India, Australia, Afghanistan leh Bangladesh te awmin, group B-ah West Indies, South Africa, England leh United States te an awm. Vawi khat ṭheuh an inkhelh kual hnuah a sang pahnih ve vein semifinal an lut ang.
Proteas hmaah US
Kumin Cricket World Cup hi United States leh West Indies ten a inthlen ṭawm a, beisei loh takin US an che ṭha. Cricket khawvela hming langsar Pakistan an tla tawh a, an tlak chhan chu US an hneh loh vang a ni. India meuh pawhin US hi an sawp thei lo a, South Africa lakah fiahin an awm dawn.
Sir Vivian Richards Stadium-ah US leh South Africa te hi an inhmachhawn dawn a, thilmak thleng ve thei a ni. Proteas hian group match-ah an khingpui an sawp vek a, mahse Nepal lakah run khat chauhin an chak.
US-in thilmak thlentir an tum ang a, chutihrualin Proteas meuh hneh tur chuan vanneih ringawt a theih loh - an chet ṭhat tel a ngai. Canada laka 94 runs zet siamtu Aaron Jones leh Pakistan leka half century siam thei Monank Patel te an chet ṭhat a ṭul dawn.
South Africa tan bowler Anrich Nortje-a'n match zawng zawng khel vekin over 16-ah wicket li a la tawh. Batting lamah Heinrich Klaasen leh David Miller te an chet ṭhat chuan awlsam takin hnehna an chang thei ang. Mahse, cricket inelnaah engpawh a thleng thei tih hriat a ṭha.
En châkawm zawk
Cricket inelna aṭanga teh chuan June 20, Ningani zing dar 6:00-a England leh Windies inkhel tur hi a ni a, chak tur pawh hriatthiam a harsa hle. Inelna thlengtu Windies hian group stage-ah an khingpui an hneh vek a, England erawh Super 8 thleng turin vanneihna an mamawh.
Three Lions hi match hmasa berah ruahsur vangin Scotland nen an inhnehtawk a, ruahsur ta lo pawh ni se an chak kher ang em tih a chiang lo. Scotland hian over 10-ah 90 runs an siam a, an inhnehtawk avangin vanduai zawkah an inngai.
England hian Australia an hneh loh zui avangin pressure an ngah a, Oman an sawp avangin dinhmun ṭhaah ding mah se match tawp berah ruahsur vangin tla thei dinhmunah an ding. Mahse, a hun takah ruah a ban zarah Namibia an sawp a, Australia-in Scotland an hneh bawk avnagin Super 8 an lut.
Windies laka hnehna chang turin Phil Salt, Jos Buttler, Jonny Bairstow leh Harry Brook te an che ṭhat a ṭul a; ball vawmtu lamah Jofra Archer leh Chris Jordan ten an theihna an lantir a ngai bawk.