Chak mamawh Croatia an inlan dawn

Croatia chuan zanin dar 6:30 hian Euro 2024-a an match hnihna an khel dawn a, Albania an hmachhawn dawn. Luka Modric hoa inlan Croatia hian match hmasa berah Spain chu 3-0 in an ngam lo a, Italy an la hmabak bawk si avangin zaninah chak ngei ngei an mamawh.

Hetiang boruak karah hian striker Andrej Kramarić chuan a ṭha thei ang bera group stage khar an duh thu a sawi. Hoffenheim forward chuan, "A ṭha thei ang bera group stage khar kan duh a, chu chu kan tum ber pawh a ni. He inelnaah hian a rei thei ang ber tel kan duh a, mipui thlawpna leh a chhehvel boruak hi chen reng kan duh.

"Kan tan hun duhawm a ni a, kan chhawr lo a nih chuan a pawi khawp ang," a ti. Mahse, zanina an hmachhawn tur Albania hi an match hmasa bera tlawm ve tawh tho an ni a, Italy chu 2-1 in an ngam lo - team pahnihin thih leh dam kara leng an ni, tih inhriain chak an duh ang.

Hetihlai hian Croatia-in chanchin lawmawm lo hriat tur an nei a, attacking mifielder Nikola Vlašić chu training-naah a inhliam avangin squad aṭangin a inhnukdawk. Vlasic chuan, "Hliam ka nei hi pawi ka ti a, Euro-a kan ram tana tha ka thawh thei lo tur hi pawi ka ti takzet a ni," tiin a sawi.