BARAKHAIH! Slovakia-in Belgium an ngam e!

European Championship an khel ṭan chauh a, chanchin ngaihnawm hriat tur a awm nghal. Thawhṭanni zan khan champion beisei zinga mi Belgium chu Slovakia-in 1-0 in an hneh a, football khawvel an barakhaih.

Slovakia tan Ivan Schranz chuan inkhela goal awmchhun a khung a, Belgium-in a chhanletna tur an nei lo. Thawhṭanni zan khan group B hi an inlan ve chauh a, Belgium hma hian group B inkhel hmasa zawkah beisei loh result a thleng tawh.

Romania chuan anni aia player langsar ngah zawk Ukraine chu 3-0 ngawtin an sawp a, Nicolae Stanciu, Razvan Marin leh Denis Dragus ten goal khat ṭheuh an khung - Ukraine lamin a chhanletna tur an neih loh avangin an tlawm.

Belgium an chesual

'Golden Generation' tih hminglem meuh an pek Belgium team kha an herliam ṭan mek a, player langsar Eden Hazard leh Toby Alderweireld te an awm tawh lo a, Real Madrid goalkeeper Thibaut Courtois-a'n Euro kal loh a thlang bawk.

Hei vang hian he team hi 'New Belgium' tih hialin an ko a, mahse, he 'new' Belgium hian golden generation-te tihtheih loh kha an tithei dawn bik lo niin a lang riau - Euro 2024-a an match hmasa berah an tlawm nghal.

Belgium hi video assistant referee vangin vawi hnih ngawt an goal pawmsak an ni lo a, hei hi chhuanlam tham tling mah se, a pawi ber chu goal khung an harsat tlat kha a ni - 60.4% ball chang chungin vawi 16 shot an nei a, goal an khung chuang lo!

Aw Lukaku...

Belgium tan striker chhuanvawr Lukaku chu 'a changtupa' aiin 'a ṭhelhtupa' a ni rih a, Belgium chance neih tam zawk chu a khung thei tlat lo - Slovakia erawhin minute sarihna leka Schranz hmanga an goal khung chu an chakpui.

Lukaku hian minute 56-naah si phurh a sutah a inngai a, mahse, Amadou Onana siamsak a tlawh luh dawn khan a lo offside. VAR hmanga ennawn a ni a, referee-in thutlukna dik a siam.

Belgian striker Lukaku vanduai a kaltluang - minute 86-naah goal a khung leh a, hei pawh VAR hmanga ennawn a nih hnuah pawmsak a ni lo. Lukaku goal khung tur siamsaktu Lois Openda chuan ball a tlan luhpui dawnin, a kutin ball a khawih thawi a, tihluih a ni lo - mahse, referee-in handball a ham a, Belgium an vanduai takzet.