200m tlan lo tur Thompson-Herah

Jamaican nula Elaine Thompson-Herah chu Paris Olympic neih hunah an ram tan 200m huangah a tlan dawn lo. Olympic gold medal panga la tawhtu hi 100m huangah erawh a inlan a rinawm thung.

Tun hnai khan Jamaica chuan Olympic 2024 atan 200m tlan tur zawnna an nei a, he hunah hian Thompson-Herah hi a inlan lo, a tel loh chhan hi sawi chian ni lo mah se tun thlatir lama hliam a neih vang kha nia ngaih a ni.

Kum 31 mi Thompson-Herah hi 100m tlan thei tak a ni bawk, khawvel hmeichhe zingah 100m tlan thleng tura hun hmang tlem pahnihna a ni hial a, a sulhnu hi a nep lo hle.

Nikum November thla khan Thompson-Herah hi a coach Shanikie Osbourne nen an inṭhen a, coach thar atan Reynaldo Walcott a ruat - ani hi Jamaica tana a teammate Shelly-Ann Fraser-Pryce enkawltu tho a ni.

Infiamna khawmpui lian Paris Olympics hi kumin nipui laia neih a ni dawn a, athletics bik hi August 1-11 chhungin an nei ang.