August 16-ah Premier League khel dawn

European Championship lam hawiin football ngainatuten an mit an len a, hetihlai hian European football-a league ngaihven hlawh ber Premier League pawhin chanchinthar an nei - August 16 zanah English top flight league hi khelh ṭan leh a ni dawn.

Season thar atana Premier League match hmasa ber hi August 16, Zirtawpni zan dar 12:30-ah khelh a ni dawn a, Manchester United leh Fulham an inhmachhawn ang.

Kum 22 hnua Premier League khel tur Ipswich Town chuan August 17 tlaiah an match hmasa ber an khel dawn a, Liverpool an mikhual nghal dawn avangin season thara an match hmasa ber hi a awlsam dawn lo tih a chiang.

Arsenal chuan August 17, Inrinni zanah vek an match hmasa ber khelin, Wolverhampton Wanderers an mikhual dawn a, kai thar Leicester City-in August 19, Thawhṭanni zanah Tottenham Hotspur an mikhual dawn thung a ni.

Hei zawng aia mipui nghahhlelh ber tura chhal ngam erawh, August 18-a team indinthar tum Chelsea leh champion lai Manchester City intawng nghal tur hi a ni - a hmuhnawm loh ring suh.

Chelsea hian Premier League-a Leicester hruai kaitu, City-a Pep Guardiola assistant Enzo Maresca chu coach turin an la lut a, Maresca leh Pep-a intawng tur hi en a châkawm hrim hrim - Stamford Bridge-ah an intawng ang.

May 25-ah Premier League hi match tawp ber khelh a ni dawn a, ṭum dang ang thoin September, October, November leh March-ah te international break a awm dawn a, August thla lai hawlah Premier League ṭan a nih dawn chauh avangin thlasik chawlh a awm dawn lo thung.

Season hman zawh takah khan kum 1995 hnua a vawi khat nan Krismas urlawk zanah match awm mah se, season tharah chuan a awm tawh dawn lo a, Krismas leh kum thar inkarah club-te chu darkar 60 aia tlemah match hnih khelhtir an ni tawh lo ang.