India-in Stimac an ban

All India Football Federation (AIFF) chuan India senior team enkawltu, Croatian coach Igor Stimac chu a hna aṭangin an ban a, Indian football thuneitu sang hian zângnadawmna chungchangah court sang zawk thlen pawh an huam niin an sawi.

May 2019 aṭang khan Stimac hian India hi enkawl ṭanin, SAFF Championship (2), Tri-Nation Series leh Intercontinental Cup-ah te champion nomawi a chawipui a, Asian Cup 2024 a hruai thleng bawk.

Croatia-in kum 1998-a World Cup semifinal an thlen ṭuma player pawimawh ni phak Stimac hian result a neih chhiat loh avangin October 2023 khan contract thar pek a ni a, a contract ang chuan kum 2026 thleng cham tur a ni.

Beisei angin thil erawh a kal vek lo - Asian Cup 2024-ah India-in chak an nei miah lo a, FIFA World Cup 2026 qualifier-ah third round inhlangkai tura beisei an nih laiin an inhlangkai thei lo bawk.

AIFF dawhtheihnain a tlin ta lo a, Stimac an ban. Croatian coach hian thla khatah cheng nuai 25 a hlawh mek a, AIFF hian a thla thum hlawh hu zângnadawmna pek a, inhriatthiam tawnnaa inṭhen turin an dawr.

Mahse, Stimac hian a duh lo a, AIFF-in an ban ta. Stimac hian ban a nih avangin zângnadawmna pek a phut ngei dawn a, a chhe berah AIFF hi vaibelchhe ruk vel thleng chawi thei dinhmunah an ding - mahse, AIFF lam hian dan anga inhmachhawn a, heti zat sum chawi loa thiam chan theih mai an inbeisei.