Aces vawi 47 siamtu Raonic

Wimbledon inbuat-saihna tournament zinga mi - Queen's Club Championship khelh laiah Milos Raonic chuan Cameron Norrie hnehin last 16 a inhlangkai.

Thawhṭanni zan Centre Court-a inkhelah Raonic hian 6-7 (6-8), 6-3, 7-6 (11-9) in hnehna a chang a, he inkhelah hian vawi 47 teh meuh aces siamin, set thum khelhna match bika aces siam tam ber record a siam hial.

Canadian star Raonic hian kum 2016 khan Wimbledon final pawh a lo thleng tawh, mahse nomawi inchuhna inkhelah Andy Murray a ngam lo, a hnu lamah erawh hliam vangin beisei a phak ta lo.

Kum 33 mi Raonic tan hun hnuhnung lam a ni tawh a, a service erawh a la hlauhawm reng. Ball vaw na leh service nei ṭha tan grass court hi hmun nuam a ni ṭhin - Wimbledon khelh hunah pawh a hlauhawm leh thei ang.